Ўзбекистон аҳолиси 38 миллиондан ошди

Миллий статистика қўмитаси маълумотига кўра, 2025 йил 1 октябрь ҳолатида Ўзбекистон аҳолиси 38 миллион 69 минг нафардан ошди, деб хабар берди қўмита.

Маълумотларга кўра, аҳолининг 19,1 миллиони эркаклар (50,4 фоиз), 18,9 миллиони эса аёллар (49,6 фоиз) ҳисобланади. Бу кўрсаткич ўтган йилнинг мос даврига нисбатан 713,7 минг нафарга ёки 1,9 фоизга кўпдир.

Шунингдек, аҳолининг 51 фоизи шаҳарларда, 49 фоизи эса қишлоқ жойларда истиқомат қилмоқда. Шаҳар аҳолиси сони 19,3 миллион, қишлоқ жойларда яшовчилар эса 18,6 миллион нафарни ташкил этмоқда.

Йил бошидан буён мамлакатда 177 мингта никоҳ қайд этилган бўлиб, 35,4 минг оила ажрашган. Ташқи миграция бўйича эса 9 ой ичида 1 133 киши мамлакатга кўчиб келган, 7 585 киши эса чет элга кўчиб кетган.

Муттахассислар таъкидлашича, аҳоли ўсиши барқарорлик ва иқтисодий имкониятлар кенгайиши билан боғлиқ бўлиб, бу демографик кўрсаткич мамлакатдаги ижтимоий ўзгаришларнинг муҳим ифодаси саналади.

Kamola Shuhratova

«ZAMIN.UZ» муҳаррири