Ўзбекистонда туғилиш ва никоҳлар сони йилдан-йилга камайиб бормоқда, деб хабар берди Статистика қўмитаси.
Маълумотларга кўра, 2025 йил 1 октябрь ҳолатида мамлакат аҳолиси 38 миллион 69 минг нафарни ташкил этган, бу ўтган йилга нисбатан 1,9 фоиз кўп.
Бироқ, туғилиш кўрсаткичлари пасайган: январь–сентябрь ойларида 664,6 минг бола туғилган бўлиб, бу ўтган йилнинг шу даврига нисбатан қарийб 30 минг нафарга кам.
Никоҳлар сони ҳам охирги 15 йилдаги энг паст даражага тушди — тўққиз ойда бор-йўғи 177 минг никоҳ қайд этилган. Солиштириш учун: 2021 йилда бу кўрсаткич 206,8 минг, 2022 йилда 197 минг, 2023 йилда эса 184,5 мингни ташкил этган.
Статистик маълумотларга кўра, аҳолининг 19,4 миллиони шаҳарларда, 18,7 миллиони қишлоқларда истиқомат қилмоқда. Самарқанд ва Фарғона вилоятлари аҳоли сони бўйича етакчилик қилмоқда, Сирдарё вилояти эса энг кам аҳолили ҳудуд ҳисобланади.
Мутасаддилар таъкидлашича, никоҳлар ва туғилишлар сонининг пасайиши аҳоли ўсиш суръатига таъсир кўрсатиши мумкин. Бу ҳолатнинг сабаблари сифатида ижтимоий ва иқтисодий омиллар тилга олинмоқда.
“Zamin”ни Telegram'да ўқинг!
