Президент Шавкат Мирзиёев АҚШ Президентининг Жанубий ва Марказий Осиё бўйича махсус вакили Сержио Гор бошчилигидаги делегацияни қабул қилди, деб хабар берди Президент матбуот хизмати.
Учрашувда АҚШ Давлат котибининг ўринбосари Кристофер Ландау ва бошқа расмийлар ҳам иштирок этди. Суҳбат чоғида икки мамлакат ўртасидаги стратегик шерикликни ривожлантириш ва Нью-Йоркда 23 сентябрь куни олий даражада имзоланган келишувларни амалга ошириш масалалари муҳокама қилинди.
Сержио Гор учрашув аввалида Дональд Трампнинг Президент Мирзиёевга йўллаган саломи ва самимий тилакларини етказди. Суҳбат якунида эса у Трамп номидан бир қатор совғалар, жумладан шахсий кепкани топширди.
Томонлар саноат, энергетика, рақамлаштириш, қишлоқ хўжалиги ва молия соҳаларидаги ҳамкорликни кенгайтириш муҳим эканини таъкидлади. Шунингдек, хавфсизлик, терроризмга қарши кураш, миграция ва минтақавий барқарорлик бўйича ҳамкорлик масалалари кўриб чиқилди.
Келгуси ҳафта Вашингтонда бўлиб ўтадиган С5+1 саммити тайёргарлиги ҳам муҳокама қилинди.
Маълумот учун, Сержио Гор — Тошкентда туғилган сиёсатчи бўлиб, Дональд Трампнинг яқин ҳамфикрларидан бири ҳисобланади. У аввал Оқ уйда кадрлар бошқармаси директори сифатида ишлаган ва 2025 йилда Трамп томонидан Ҳиндистондаги элчи лавозимига номзод этиб кўрсатилган.
Ҳозирда у АҚШнинг Жанубий ва Марказий Осиё бўйича махсус вакили сифатида фаолият юритмоқда.
“Zamin”ни Telegram'да ўқинг!
