Ўзбек қизининг “Осиёнинг Гарварди”даги ғалабаси — миллий ифтихор рамзи
Корея Республикасининг энг нуфузли университетларидан бири саналган Ёнсе университетида (Yonsei University) бўлиб ўтган 31-халқаро корейс тили ва адабиёти ижодий танловида ўзбекистонлик талаба, Тошкент давлат шарқшунослик университетининг 4-босқич талабаси Сабоҳат Ғофурова хорижлик иштирокчилар орасида биринчи ўринни қўлга киритди. Бу нафақат бир ёш иқтидор соҳибасининг, балки бутун Ўзбекистон таълим тизими ва ёш авлодининг катта ютуғидир.
76 давлат ва 1400 иштирокчи орасида ўзбек қизининг зафарли чиқиши
Кореяда 2025 йил 1 октябрь куни ўтказилган мазкур танлов Хангул — корейс ёзувининг яратилишига 579 йил тўлган сана муносабати билан ташкил этилди. “Ойна” мавзусидаги шеър ва “Хотиралар” мавзусидаги эссе йўналишларида жаҳоннинг 76 мамлакатидаги 1400 дан зиёд иштирокчи ўз ижодини тақдим этди.
Танлов жараёнида иштирокчилар нафақат тилни мукаммал билишини, балки корейс маданиятига бўлган ҳурмати ва эстетик ҳис-туйғулари орқали ҳам баҳоланди.
Сабоҳатнинг асари ҳакамлар ҳайъатида катта таассурот қолдирди. Унинг ижодий ишида тилга муҳаббат, хотира, инсон қалби ва маданият уйғунлиги чуқур ҳис қилинган. Шунинг учун ҳам ўзбек талабаси нафақат хорижликлар орасида биринчи, балки умумий рейтингда корейс иштирокчилар билан бир қаторда учинчи ўринни эгаллади.
Ёнсе университети — илм ва маданиятнинг Осиёдаги тимсоли
1885 йилда ташкил этилган Ёнсе университети Корея таълим тизимининг ифтихори ҳисобланади. Унинг нуфузи шунчалик юқорики, дунёда “Осиёнинг Гарварди” деб тан олинади. Университет QS ва Times халқаро рейтингларида йиллар давомида 100 талик орасида ўрин олиб келади.
Samsung, LG, Hyundai каби йирик компаниялар асосчилари айнан шу даргоҳда билим олган. Университет фақат илмий жиҳатдан эмас, балки маданий ва ижодий муҳитда ҳам юқори нуфузга эга.
2024 йилда унинг битирувчиси, ёзувчи Хан Ган адабиёт бўйича Нобель мукофотига сазовор бўлгани бу таълим муассасасининг халқаро миқёсдаги обрўсини янада мустаҳкамлади.
Ўзбек ёшлари – янги авлоднинг халқаро ютуқлари
Сабоҳат Ғофурованинг бу ютуғи ортида йиллар давомида қилинган меҳнат, интизом ва илмий фидойилик ётади. Унинг ғалабаси сўнгги йилларда Ўзбекистон таълим тизимида амалга оширилаётган туб ислоҳотлар, хорижий тилларни ўрганишга яратилаётган имкониятлар ва ёшлар учун очилаётган янги йўлларнинг натижаси сифатида баҳоланади.
Президент Шавкат Мирзиёев ташаббуслари билан сўнгги йилларда ёшлар учун халқаро стипендиялар, академик алмашинувлар ва замонавий таълим муҳити яратилмоқда. Сабоҳатнинг ғалабаси ана шу сиёсатнинг самараси эканини ҳаётнинг ўзи исботлаб турибди.
Миллий ифтихор ва илҳом манбаи
Сабоҳатнинг бу муваффақияти нафақат шахсий ютуқ, балки ўзбек ёшларининг халқаро майдондаги нуфузини кўрсатувчи ёрқин намунадир. Унинг номи орқали Ўзбекистон илмий ва маданий салоҳияти яна бир бор жаҳон саҳнасида янгради.
Бу ғалаба ҳар бир ёшга илҳом бағишлайди: меҳнат, билим ва сабот билан дунёда ҳар қандай чўққини забт этиш мумкинлигини исботлайди.
Ўзбек қизининг “Осиёнинг Гарварди”даги биринчилиги — юртимиз ёшлари учун янги илҳом, халқимиз учун эса фахр ва ифтихор манбаи бўлди.
“Zamin”ни Telegram'да ўқинг!
