Ўзбекистоннинг Екатеринбург шаҳридаги Бош консулхонаси ва Миграция агентлиги ваколатхонаси ташаббуси билан маҳаллий йирик компаниялар иштирокида муҳим учрашувлар ўтказилди, деб хабар қилмоқда "Дунё" АА. Мазкур музокаралар асосий эътиборини ўзбекистонлик мутахассисларни қонуний, хавфсиз ва тизимли равишда ишга жойлаштириш, шу билан бирга икки томонлама иқтисодий ҳамкорликни кучайтиришга қаратди.
Дастлаб Россиянинг нефт-газ, энергетика, саноат ва қурилиш йўналишларида 90 дан зиёд лойиҳаларни амалга ошираётган “Евракор” АЖ вакили Олга Севец билан суҳбат ташкил этилди. Унинг таъкидлашича, компания тузилган шартнома асосида қабул қилинган ишчиларни бепул турар жой, озиқ-овқат, кафолатланган маош ва барча зарур шароитлар билан таъминлайди. Шу билан бирга, ходимларни танлаш, патент расмийлаштириш ва иш жойига етказиш бўйича ҳам аниқ таклифлар билдирилди.
Мулоқот давомида “Евракор”даги иш жараёни, меҳнат ва яшаш шароитлари, ҳужжатлар рўйхати, хорижлик ходимлар учун талаб этиладиган қоидалар батафсил ёритилди. Компания томонидан ўзбекистонлик мутахассисларга бўлган талаб юқори экани ҳам қайд этилди.
Шунингдек, Тюмен шаҳрида салат ва руккола қайта ишлашга ихтисослашган “Прованс” МЧЖ директори Татяна Овсянкина билан ҳам учрашув бўлиб ўтди. У компаниянинг Ўзбекистондан айсберг салати ва руккола импорт қилaётганини, ички бозорда бу маҳсулотларга талаб катталиги боис ойига 200 тонна айсберг ва 40 тонна руккола харид қилишни мўлжаллаётганини маълум қилди. Шу муносабат билан у ўзбек фермерлари ва экспортчилар билан тўғридан тўғри ҳамкорлик ўрнатишда кўмак сўради.
Учрашувларда ўзбек томони республика бўйлаб замонавий моно-марказлар фаолият юритаётгани, улар орқали кадрлар танлови, ўқитиш ва иш берувчилар билан тўғридан-тўғри ҳамкорлик самарали йўлга қўйилганини таъкидлади.
Музокаралар якунида томонлар бўш иш ўринлари, меҳнат ва яшаш шароитларини яхшилаш, ҳужжатлар расмийлаштиришдаги мавжуд муаммоларни ҳал этиш ҳамда Ўзбекистондан қишлоқ хўжалиги маҳсулотлари экспорт ҳажмини кенгайтириш бўйича аниқ амалий тадбирларни келишиб олди.
Бу учрашувлар икки давлат ўртасидаги меҳнат бозоридаги ҳамкорлик нафақат давом этаётганини, балки янги босқичга кўтарилаётганини ҳам кўрсатмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
