Хитойнинг Hanrun Paper Company компанияси Самарқанд вилоятида йирик саноат лойиҳасини амалга ошириш учун 500 миллион АҚШ доллари миқдорида сармоя киритмоқчи. Бу ҳақда компания вакиллари вилоят ҳокими Адиз Бобоёв билан учрашувда маълум қилди. Бу ҳақда uzdaily.uz хабар беради.
Лойиҳа доирасида саноат картони, қадоқлаш қоғози ҳамда офис қоғози ишлаб чиқаришга ихтисослашган замонавий мажмуа барпо этилиши кўзда тутилган. Қурилиш ва ишга тушириш жараёнлари беш босқичда амалга оширилади.
Ишлаб чиқаришни жойлаштириш учун 50 гектардан ортиқ ер майдони талаб этилади. Ҳозирда Ургут эркин иқтисодий зонаси ҳудудидаги “Ҳишрау 2” массивида жойлашган ер участкалари кўриб чиқилмоқда ва яқин кунларда улар аукционга чиқарилиши кутилмоқда.
Инвесторлар таъкидлашича, ушбу завод Марказий Осиёда ўхшаши бўлмаган ягона корхонага айланиши мумкин. Лойиҳа ҳисобига қарийб 3 мингта янги иш ўрни яратилиши режалаштирилган.
Шунингдек, корхона ишга тушгач, давлат бюджетига йилига 50–60 миллион АҚШ доллари миқдорида солиқ тушумлари келиб тушиши прогноз қилинмоқда. Вилоят ҳокими лойиҳа ҳудуднинг ижтимоий-иқтисодий ривожланиш устувор йўналишларига мос эканини билдириб, ташкилий ва инфратузилмавий масалаларни тезкор ҳал қилиш ҳамда лойиҳа жараёнини доимий қўллаб-қувватлаш бўйича тўлиқ кўмак берилишини маълум қилди.
“Zamin”ни Telegram'да ўқинг!
