Ўзбекистонда ҳафтанинг биринчи ярмида ҳаво ҳарорати пасайиб, кейинги кунларда эса яна исиши кутилмоқда. “Ўзгидромет” маълумотларига кўра, об-ҳаво дастлаб барқарор ва илиқ бўлиб, кейинчалик нобарқарорлашади.
Дастлаб илиқ, кейин ёмғирли кунлар
20 апрель, душанба куни мамлакатнинг катта қисмида қуруқ ва илиқ ҳаво сақланиб туради. Фақат Қорақалпоғистон ва Хоразм вилоятининг айрим ҳудудларида қисқа муддатли ёмғир ва момақалдироқ кузатилиши мумкин. Кундузги ҳарорат 24–29 даража атрофида бўлади.
21–23 апрель кунлари республиканинг турли ҳудудларида қисқа муддатли ёмғирлар ёғиши, айрим жойларда момақалдироқ кузатилиши кутилмоқда. 21 апрелда ҳаво 24–29 даража атрофида иссиқ бўлса, 22–23 апрел кунлари ҳарорат аста-секин 18–23 даражагача пасаяди.
Шамол кучайиши ва чанг-тўзон эҳтимоли
20–22 апрель кунлари баъзи ҳудудларда шамол тезлиги 15–20 м/с гача кучайиши мумкин. Айрим жойларда чанг кўтарилиши ҳам эҳтимолдан холи эмас.
Ҳафта охирида яна исиш
24 апрелдан бошлаб мамлакатнинг барча ҳудудларида яна қуруқ ва илиқ об-ҳаво қайд этилади. Ҳарорат кўтарилиш тенденциясига ўтади.
Тоғли ва тоғолди ҳудудларда эса вақт-вақти билан ёмғир ёғиши сақланиб қолади. Шу билан бирга, сел ва сув тошқинлари хавфи ҳам мавжуд экани огоҳлантирилмоқда.
Тошкентдаги об-ҳаво
Тошкент шаҳрида душанба куни ёғингарчилик кутилмайди. Сешанба куни куннинг иккинчи ярмида қисқа муддатли ёмғир ва момақалдироқ бўлиши мумкин.
20–21 апрель кунлари ҳаво 25–28 даража атрофида бўлади. 22 апрелда 24–26 даража, 23 апрелда эса 20–22 даражагача пасайиши кутилмоқда. 24 апрелда ёғингарчилик кузатилмайди ва ҳарорат яна 25–27 даражагача кўтарилади.
