Автотўхташ ҳудудларида хавфсизлик қоидалари кучайтирилди

Автотранспорт тўхташ жойларида ҳаракат хавфсизлигини таъминлаш мақсадида янги қоидалар белгиланди. Унга кўра, автомобиллар бу ҳудудларда соатига 5 километрдан ортиқ тезликда ҳаракатланиши тақиқланади. Бу қоида йўловчилар, ҳайдовчилар ва умумий хавфсизликни таъминлашга қаратилган.

Шунингдек, автомобиль тўхташ жойлари ҳудудида бир қатор фаолиятлар ҳам чекланади. Жумладан, махсус ажратилмаган жойларда транспорт воситаларини таъмирлаш, ювиш ҳамда ёнилғи ва мойлаш материалларини қуйиш тақиқланади. Шу билан бирга, очиқ оловдан двигатель ва агрегатлар учун фойдаланишга ҳам рухсат берилмайди.

Қоидага кўра, бу ҳудудларда тамаки чекиш ва спиртли ичимликлар истеъмол қилиш ҳам ман этилади. Шунингдек, ёнилғи-мойлаш материалларини сақлаш учун алоҳида жойлар ташкил этишга рухсат берилмайди. Ушбу чоралар ёнғин хавфи ва бошқа хавфли ҳолатларнинг олдини олиш мақсадида жорий этилган.