Ўзбекистонда уй-жой бозорида фаоллик сезиларли даражада ошди, деб UzA.uz хабар берди. Жорий йилнинг март ойида республика бўйича уй-жой олди-сотди битимлари сони 43,6 мингтани ташкил этди. Бу кўрсаткич февраль ойига нисбатан 47 фоизга юқори бўлгани билан эътиборга лойиқ.
Иқтисодий тадқиқотлар ва ислоҳотлар маркази маълумотига кўра, бозордаги бундай ўсишга бир нечта омиллар таъсир кўрсатган. Жумладан, апрель ойидан жорий этилган янги ҳисоб-китоб тартиби айрим харидорларни уй-жой сотиб олишни олдинроқ амалга оширишга ундаган бўлиши мумкин. Шу сабабли март ойида талаб кескин ошгани кузатилган.
Йиллик таққослашда ҳам бозорда катта ўсиш қайд этилди. Хусусан, жорий йил март ойидаги битимлар сони ўтган йилнинг шу даврига нисбатан икки бараварга кўпайган. Бу эса кўчмас мулк бозорида барқарор ўсиш тенденцияси шаклланаётганини кўрсатади.
Ҳудудлар кесимида қаралганда, барча вилоятларда фаоллик ошган. Энг юқори ўсиш Сирдарё вилоятида кузатилиб, бу ерда битимлар сони 64,6 фоизга ошган. Шунингдек, Жиззах вилоятида 73,2 фоиз, Наманганда эса 63 фоизлик ўсиш қайд этилган. Андижон, Бухоро, Самарқанд, Сурхондарё вилоятлари, Қорақалпоғистон Республикаси, Тошкент вилояти ва Тошкент шаҳрида ҳам ўсиш суръатлари 40–50 фоиз атрофида бўлган.
“Zamin”ни Telegram'да ўқинг!
