Ўзбекистонда 2024 йил 1 майдан бошлаб Humo тўлов тизими карталари учун SMS-хабарнома хизмати нархи икки бараварга оширилади. Оcтотелеcом контент-провайдери маълумотига кўра, 13131 қисқа рақамидан келадиган ҳар бир кирувчи хабар нархи амалдаги 84,2 сўмдан 168,4 сўмга кўтарилади. Ушбу ўзгариш ҳақида мамлакатдаги йирик мобил алоқа операторлари — "Mobiuz", "Ucell" ва "Beeline" ҳам ўз мижозларини огоҳлантирган. Бу ҳақда Spot.uz хабар беради.
Компания вакиллари нархлар ошишини техник инфратузилмани сақлаш, дастурий таъминотни ишлаб чиқиш ва хизмат хавфсизлигини таъминлаш харажатлари ортгани билан изоҳлади. Шунингдек, энергия ресурслари нархи ва лицензия тўловлари кўтарилгани ҳам тариф ўзгаришига сабаб бўлган. Агар фойдаланувчи ушбу хизматни ўчирмоқчи бўлса, 13131 қисқа рақамига "STOP" сўзини юбориши кифоя.
Шу билан бирга, "Click" тўлов ташкилоти томонидан тақдим этиладиган "SMS-ахборот 880" хизмати нархи ҳам келаси ойдан 168,4 сўм этиб белгиланади. Эслатиб ўтамиз, аввалроқ "Uzcard" тўлов тизими учун ҳам SMS-хабарнома тарифлари худди шундай миқдоргача оширилган эди. Humo тизимида бир марталик OTP-кодлар ҳам айнан 13131 рақами орқали юборилади ва хабар етказилгани учун тўлов фойдаланувчи балансидан ечиб олинади.
“Zamin”ни Telegram'да ўқинг!
