Ўзбекистонда май ойининг илк кунлари баҳорий, бироқ беқарор об-ҳаво билан бошланади. Бу ҳақда Ўзгидромет синоптиклари маълум қилди.
Прогнозларга кўра, республика ҳудудининг катта қисмида ёғингарчилик кузатилиб, айрим жойларда момақалдироқлар бўлиши мумкин. Фақат Қорақалпоғистон Республикаси, Хоразм вилояти ва Навоий вилоятининг шимолий қисмларида ёмғир кутилмаяпти.
Синоптиклар таъкидлашича, 2–3 май кунлари ёғингарчилик камаяди ва асосан айрим ҳудудлардагина қисқа муддатли ёмғирлар кузатилиши мумкин.
Ҳарорат кўрсаткичлари ҳам бироз пасаяди. Жумладан, 1 май куни кундузи ҳаво 27–30 даража атрофида бўлса, дам олиш кунлари 22–25 даражага тушиши кутилмоқда. Шимоли-ғарбий ҳудудларда жума куни 20–23 даража бўлиши, якшанбага келиб эса яна 27–30 даражагача кўтарилиши прогноз қилинган.
Тоғ олди ва тоғли ҳудудларда эса 1–3 май кунлари вақти-вақти билан ёмғир ёғиши, айрим жойларда кучли момақалдироқлар кузатилиши мумкин. Шунингдек, сел-сув тошқинлари хавфи ҳам истисно этилмаяпти.
Тошкент шаҳрида жума куни куннинг иккинчи ярмида қисқа муддатли ёмғир ёғиши ва момақалдироқ бўлиши мумкин. Ҳарорат 28–30 даража бўлади. Шанба ва якшанба кунлари ҳам вақт-вақти билан ёмғир ёғиб туриши эҳтимоли бор. Бу кунларда кечаси 13–15 даража, кундузи эса 22–24 даража атрофида бўлиши кутилмоқда.
Мутахассислар аҳолини об-ҳаводаги ўзгаришларга тайёр туришга ва эҳтиёткорлик чораларини кўришга чақирмоқда.
