Беш соатлик йўл 2,5 соатга қисқаради! Тошкент – Самарқандни боғловчи янги пуллик автомагистраль қурилади

Тошкентдан Самарқандга автомобиль орқали бориш учун сарфланадиган вақт икки баробарга қисқариши мумкин. Ўрта Чирчиқ туманида Президент Шавкат Мирзиёев иштирокида икки шаҳарни боғловчи янги пуллик автомагистраль қурилиши бошлаб берилди. Йўл ишга тушгач, сафар вақти беш соатдан 2,5 соатга тушиши айтилди.

Янги трассанинг узунлиги 282 километр, умумий қиймати эса қарийб 2,2 миллиард доллар бўлади. Ҳар икки йўналишда учтадан ҳаракат тасмаси қурилади. Текис ҳудудларда рухсат этилган тезлик соатига 150 километргача етиши кўзда тутилган.

Автомагистраль оддий асфальт эмас, оғир ва тез ҳаракатланувчи транспорт қатновига мос монолит бетон билан қопланади. Йўл бўйлаб 92 та кўприк, 28 та йўл ўтказгич, 60 та туннелли ўтиш жойи ҳамда сув ўтказиш иншоотлари қурилади.

Лойиҳа тугаллангач, йўлдан бир суткада 80 мингтагача машина ўтиши мумкин. Бир маромдаги ҳаракат ёқилғи ва техник харажатларни камайтириб, юк ташиш нархини 19–24 фоизга арзонлаштириши кутилмоқда. Йўл 2030 йилда очилиши режалаштирилган.