Сурхондарёда тиббиёт ходимларига рағбатлантириш пуллари тўлаб берилмагани аниқланди

Сурхондарё вилоятида Бош прокуратура ўтказган текширувда COVID-19 коронавирус инфекцияси билан касалланганларни даволаётган тиббиёт ходимларининг рағбатлантириш пуллари тўлаб берилмагани аниқланди. Бу ҳақда ЎзА хабар қилган.

Маълум бўлишича, вилоятда жами 2868 нафар шахс карантинга олинган, 44 нафар беморда коронавирус инфекцияси аниқланган, 43 нафар одам касалликдан тузалган ва 1 нафар шахс COVID-19 асоратлари оқибатида вафот этган.

Карантин тадбирларига 235 нафар шифокор, 459 нафар ўрта тиббиёт ходими, 155 та кичик тиббиёт ходими ҳамда 139 нафар бошқа ходимлар жалб этилган.

1473 нафар ходимга 2,5 миллиард сўмлик рағбатлантириш маблағлари тўлаб берилмагани, 1264 нафар ходимга 1,6 миллиард сўмлик рағбатлантириш маблағини молиялаштириш ва тўлаб бериш масаласи кўриб чиқилмагани аниқланган.

Бош прокуратуранинг аралашуви билан ўз вақтида тўланмаган 5,6 миллиард сўм рағбатлантириш маблағларининг ходимларга тўлаб берилиши таъминланди, дейилган хабарда.

Манба: Daryo.uz

Янгиликлар