Россия қурол захираларини тўлдирмоқда, заводлар уч сменада ишлай бошлаган

^{Фото: Reuters}
Россия ҳарбий техника ва қурол-яроқ захираларини тўлдирмоқда. Бу ҳақда мамлакат ҳарбий ишлаб чиқариш коллегияси раҳбарининг биринчи ўринбосари Андрей Елчанинов «Интерфакс» билан суҳбатда айтган.

Елчаниновнинг айтишича, Россия ҳарбий ишлаб чиқариш комплекси юқори қувватда, тинимсиз ишламоқда. Кўпчилик заводлар икки сменада ишлаяпти, баъзилари уч сменали узлуксиз ишлаш тизимига ўтган. Унинг айтишича, корхоналар Россия Мудофаа вазирлиги, Миллий гвардия ва бошқа куч ишлатар тузилмалардан ташқари ўзини мустақил деб эълон қилган «Донецк халқ республикаси» ва «Луганск халқ республикаси» милиция хизматлари буюртмаларига асосан қурол ишлаб чиқармоқда.

Россия Мудофаа вазирлиги ўқдори буюртма қилишни оширган: «Аниқ етиб борувчи ўқдорилар ишлаб чиқариш бирламчи мақсад бўлиб турибди. Кейинги ўринларда эҳтиёжга қараб учувчисиз техника, авиация ва зирҳли техника буюртма қилишмоқда», деган Елчанинов.

Унинг айтишича, Россия ҳарбийлар эҳтиёжларини қоплашдан ташқари қурол-яроқ ҳамда ҳарбий техника захираларини тўлдиришга эътибор қаратган, шу сабаб баъзи заводлар тинимсиз ишлаш режимига ўтган, барча захира техника ва ишчи кучлари жалб қилинган.

Янгиликлар