Путин Россияда Инсон ҳуқуқлари бўйича Европа судининг қарорларини бажармаслик ҳақидаги қонунни имзолади

^{Фото: «РИА Новости»}
Россия президенти Владимир Путин Инсон ҳуқуқлари бўйича Европа судининг (ЭҲМ) 2022 йил 15 мартдан кейин қабул қилинган қарорларини ижро этмаслик тўғрисидаги қонунни имзолади.

Президент томонидан имзоланган яна бир қонунда Жиноят ишларини кўриб чиқиш учун асослар қаторидан Инсон ҳуқуқлари бўйича Европа судининг қарорлари олиб ташланган.

Россия 15 мартгача қабул қилинган қарорлар бўйича 2023 йилгача компенсация тўлайди. Ушбу тўловлар рублда амалга оширилади.

Путин имзолаган қонунлар Россия март ойи ўрталарида Европа Кенгашидан чиқариб юборилиб, Инсон ҳуқуқлари бўйича Европа суди Россияга қарши шикоятларни кўриб чиқишни тўхтатган кейин Давлат Думаси томонидан қабул қилинган эди.

Инсон ҳуқуқлари бўйича Европа суди Россия фуқаролари мамлакат судларининг қарорлари устидан шикоят қилиши ёки ўз ҳуқуқлари ҳокимият томонидан бузилгани ҳақида арзнома йўллаши мумкин бўлган инстанция эди. Шикоятлар сони бўйича Россия етакчилардан бири бўлиб келган.

Гарчи 2015 йилда Россия Конституциявий суди Инсон ҳуқуқлари бўйича Европа судининг қарорларини бажарилмайдиган деб топиши мумкинлиги тўғрисида қонун қабул қилинган бўлса-да, расмийлар Страсбург суди томонидан қўйилган жарималарни мунтазам равишда тўлаб келган. “Замин” янгиликларини “Одноклассники”да кузатиб боринг