Нурсултон Назарбоев Москвада Россия президенти Владимир Путин билан учрашди

^{Фото: Назарбоев расмий сайти}
Қозоғистон собиқ президенти Нурсултон Назарбоев Москвада Россия президенти Владимир Путин билан учрашди. Назарбоев Путинни Россия куни билан табриклаган. Бу ҳақда элбошининг расмий сайтида хабар берилди.

Хабарда айтилишича, томонлар Қозоғистон ва Россия ўртасидаги муносабатлар ўрнатилганининг 30 йиллиги муносабати билан бир-бирини табриклаган. Назарбоев ва Путин бир-бирига саломатлик тилаб, кейинчалик мулоқотни давом эттиришга келишиб олган.

Қозоғистон мустақил ОАВлари Назарбоев бир неча кундан буён Москвада бўлгани ҳақида ёзишмоқда. Журналистлар элбоши самолётининг парвозлар тарихини кузатиб шундай хулосага келган, шунингдек, ижтимоий тармоқларда Путин билан учрашувдан аввал Назарбоевнинг Москвада юргани кўринган суратлар тарқалди. Кремл расмий сайтида ҳозирча Назарбоев билан учрашув ҳақида хабар берилмаган.