АҚШ давлат котиби Энтони Блинкен россияликларни Россия куни билан табриклади

^{Фото: Picture Alliance}
Россияликлар репрессияларсиз яшашга, оқибатларидан қўрқмасдан ўз инсон ҳуқуқлари ва асосий эркинликларидан фойдаланишга лойиқдир, деди Давлат департаменти раҳбари.

12 июнь, Россия куни муносабати билан АҚШ давлат котиби Энтони Блинкен россияликларга «тинч, очиқ келажак» тилади. «Россия фуқаролари, бутун дунёдаги одамлар каби, қатағонлардан холи яшашга, ўзларининг инсон ҳуқуқлари ва асосий эркинликларидан оқибатлардан қўрқмасдан фойдаланишга ҳақлидир. Бунга ўз фикрини айтиш, фуқаролик ва сиёсий фаолиятда тинч иштирок этиш имконияти ҳам киради», дейилади Блинкеннинг давлат департаменти матбуот хизмати томонидан тарқатилган баёнотида.

Афсуски, «Кремль фуқаролик жамияти ва мустақил оммавий ахборот воситаларига нисбатан тазйиқни кучайтирган» бугунги Россияда бу реал нарса эмас», деди Блинкен.

«Россия фуқароларининг кўпчилиги ҳукуматга хатти-ҳаракатлари тўғрисида ҳақиқатни айтган «жинояти» учун панжара ортида ўтирибди. Бу ички репрессия Кремль қўшни суверен давлатга қарши асоссиз уруш олиб бораётган бир пайтда содир бўлмоқда», - дейди у. Блинкеннинг сўзларига кўра, «Россия ҳукумати ўз фуқароларини Украина халқига қарши юз бераётган ваҳшийликлар ҳақида бехабар қолдиришга ҳаракат қилмоқда».

Кремль уруши Россиянинг халқаро яккаланишига олиб келди ва Россия фуқароларини қўшнилари билан ҳамжиҳатликда яхши келажак қуриш имкониятидан маҳрум қилди, дея қайд этган Энтони Блинкен. «Бу изоляция муқаррар ҳолат эмас, бу Россия етакчилари томонидан қабул қилинган қарорлар натижасидир», - деди у. Давлат департаменти раҳбарининг сўзларига кўра, АҚШ «1990 йил июнидаги каби, ҳамон эркинлик ва қадр-қимматга интилаётган, катта хавф остида қолган Россия халқининг интилишларини тан олади».

12 июнь Россия куни муносабати билан бутун дунёда Россиянинг Украинага бостириб киришига қарши норозилик намойишлари бўлиб ўтди. Ушбу тадбирлар дунёнинг 30 та давлатидаги диаспораларнинг биргаликдаги саъй-ҳаракатлари билан ташкил этилди ва «Путинизмдан мустақиллик куни» деб номланди.

«32 йил аввал, 1990 йил 12 июнда Россия суверенитети тўғрисидаги декларация қабул қилинган (гап РСФСР давлат суверенитети тўғрисидаги декларация ҳақида кетмоқда – таҳр.), унда Россия давлати демократик ҳуқуқлар, эркинликлар, халқаро ҳуқуқ тамойилларини ҳурмат қилиш, барча мамлакатлар ва халқлар билан тинч-тотув яшаш мажбуриятини олган. 32 йилдан сўнг Кремль ўз мамлакатида илгари демократик институтларни бостирган ҳолда Украинага қарши уруш бошлади», — дея Варшавадаги рус диаспораси DW’га акциянинг асосий ғоясини тушунтирди.

Ташкилотчиларнинг сўзларига кўра, хориждаги россияликлар «байрам қилиш учун эмас, балки эркин Россия учун курашиш» мақсадида, суверенитет декларацияси руҳини эслатиш учун глобал акцияда қатнашган. “Замин” янгиликларини “Telegram”да кузатиб боринг