Украина Олий Радаси медиа воситалари ва жамоат жойларида Россия мусиқасини тақиқлади

^{Фото: Getty Images}
Украина Олий Радаси медиа воситалари ва жамоат жойларида Россия мусиқасини тақиқловчи қонунни қабул қилди, деб маълум қилди украиналик депутат Ярослав Железняк. Рада сайтида нашр этилган материалга кўра, қонун қабул қилиниши учун 303 нафар депутат овоз берган.

Қонун матнида айтилишича, Украинада «агрессив» деб эълон қилинган мамлакат фуқаросининг ижоди асосидаги «фонограммалар, видеограммалар ва клиплар»ни омма олдида ижро этиш ва намойиш этиш тақиқланади.

Бу талаб 1991 йилдан бери Россия фуқаролигига эга бўлган ижрочиларнинг қўшиқларига тааллуқлидир. Қоида Россия фуқаролигидан воз кечиб, Украина фуқаролигини олганларга тааллуқли эмас.

Бундан ташқари Рада Россия ва Беларусдан, шунингдек, Украинанинг босиб олинган ҳудудларидан китоб ва бошқа нашриёт маҳсулотларини олиб кириш ва тарқатишни тақиқловчи қонунни қабул қилди.

Март ойида Владимир Зеленский Россия пропагандасини тақиқловчи қонунни имзолаганди. Қонун Россиянинг Украинага қарши қуролли тажовузини оқлаш, унга алоқадор шахсларни мақташни тақиқлайди. Россиянинг ҳаракатларини оқловчи партиялар ва россияпараст ташкилотлар фаолияти суд қарори билан тугатилиши мумкин. «Замин» янгиликларини «Вконтакти»да кузатиб боринг