Афғонистондаги кучли зилзила қурбонлари мингга яқинлашди

Афғонистоннинг иккита вилоятида содир бўлган кучли зилзила оқибатида ҳалок бўлганлар сони минг нафарга яқинлашган. Бу ҳақда Aamaj News хабар тарқатган.

«Пахтика ва Хост вилоятларидаги зилзила қурбонлари сони 920 кишига етган, 610 киши жароҳатланган», дейилади расмий хабарда.

«Толибон» бошқарувидаги Афғонистон ҳукумати ер қимирлашига оид шошилинч йиғилиш ўтказган. Унда зилзиладан жабр кўрганларга зудлик билан ёрдам кўрсатиш вазифаси топширилган.

Шунингдек, икки вилоят ҳудудига тез тиббий ёрдам, озиқ-овқат, кийим-кечак ва жабр кўрган оилаларга маблағ юбориш масаласи ҳам кўтарилган.

Эслатиб ўтамиз, бугун кечаси соат иккилар атрофида Афғонистонда 6.1 балли зилзила содир бўлган. Ер қимирлаши Қашқадарё, Самарқанд ва Жиззахда 2, Сурхондарёда 3 балл бўлиб таъсир ўтказган. «Замин»ни Telegram’да ўқинг!