АҚШ ва Германия Россияни дунёда очарчиликни келтириб чиқараётганликда айблади

Германия ва АҚШ Россияни дунёда озиқ-овқат инқирозини келтириб чиқараётгани учун танқид қилди. «Бу инқирознинг ягона сабаби – Россиянинг Украинага нисбатан тажовузкорлиги», деди АҚШ Давлат департаменти раҳбари Энтони Блинкен 24 июнь, жума куни Берлинда Германия ташқи ишлар вазири Анналена Бербок билан бўлиб ўтган қўшма матбуот анжуманида.

Блинкеннинг сўзларига кўра, бутун дунё бўйлаб озиқ-овқат нархининг ошиши Россиянинг Қора денгиздаги Украина портларини тўсиб қўйгани, шунингдек, Россиядан озиқ-овқат экспортига чекловлар қўйгани билан боғлиқдир.

Ўз навбатида, Бербок Россиянинг «бемаъни «ғалла уруши» ҳақида гапирди, бу билан Москва «бутун давлатларни беқарорлаштириш учун қасддан озиқ-овқат нархларини ошириб юбормоқда».

Блинкен ва Бербок G7 йиғилиши олдидан жума куни Берлинда Германия ҳукумати томонидан ташкил этилган халқаро озиқ-овқат конференциясида қатнашди.

«Биз, «Катта еттилик» Россиянинг босқинчилик уруши дунёда очарчилик келтириб чиқаришига йўл қўймаймиз. Биргаликда ҳаракат қиламиз», - деди Блинкен. Бербокнинг сўзларига кўра, саноати ривожланган давлатлар, Россиянинг Украинага қарши уруши туфайли келиб чиққан инқирознинг ёмонлашувига жавобгар бўлмаса ҳам, масъулият билан ҳаракат қилмоқда.

Россия президенти Владимир Путин аввалроқ Украинадаги уруш учун Россияга қарши санкциялар қўйган ғарб давлатларини инқирозни келтириб чиқаришда айблаганди. Бу санкциялар Россиядан ғалла, бошқа қишлоқ хўжалиги маҳсулотлари ва ўғитлар экспортини мураккаблаштирди. Блинкен ва Бербок бу баёнотни рад этди ҳамда озиқ-овқат ва ўғитларга нисбатан санкциялар йўқлигини таъкидлади. “Замин” янгиликларини “Facebook”да кузатиб боринг