Саидов ва Лавров Украинадаги вазиятни муҳокама қилди

^{Фото: Sputnik / Илья Питалев}

22 май куни Россия ташқи ишлар вазири Сергей Лавров Москвага ташриф буюрган Ўзбекистон ташқи ишлар вазири Бахтиёр Саидов билан музокара ўтказди.

Россия ТИВ матбуот хизмати хабарига кўра, ташқи сиёсат идоралари раҳбарлари Россия ва Ўзбекистон ўртасидаги стратегик шериклик, иттифоқчилик ва кўп қиррали икки томонлама ҳамкорликни янада мустаҳкамлаш билан боғлиқ барча масалаларни, жумладан, унинг сиёсий, савдо-иқтисодий, илмий-техникавий, маданий-ҳуманитар компонентларни муҳокама қилди.

Томонлар, шунингдек, бўлажак олий ва юқори даражадаги давлатлараро алоқалар жадвалини ҳам тасдиқладилар.

«Минтақавий ва халқаро хавфсизлик масалаларини муҳокама қилар экан, Лавров Украинадаги мавжуд вазият ва махсус ҳарбий операциянинг боришини Россия томонидан баҳолади», — дейилади хабарда.

Бундан ташқари, Афғонистондаги вазият, минтақада барқарорлик ва хавфсизликни мустаҳкамлаш бўйича қўшимча чора-тадбирлар атрофлича кўриб чиқилди. БМТ ва ЕХҲТ платформасида мавжуд халқаро вазиятга боғлиқ бўлмаслиги керак бўлган ўзаро ҳамкорлик муҳимлиги қайд этилди.

Шухрат Раззаков

«ЗАМИН.УЗ» муҳаррири