Мубашшир Аҳмад озодликка чиқарилди

^{Фото: “Азон Глобал”}
Ўзбекистоннинг Туркиядаги элчихонаси Мубашшир Аҳмад озодликка чиқарилганини маълум қилди.

Мубашшир Аҳмад тахаллуси билан танилган Алишер Турсунов 2023 йилнинг 28 декабрь куни Туркия полицияси томонидан ўзи яшаб турган уйидан олиб кетилган ва Истанбул вилояти Чаталжа туманида жойлашган Бинкилич депортация марказига жойлаштирилган эди. Бугун 21 февраль куни у депортация марказидан оиласи бағрига қайтди.

Воқеа ҳақида

“Азон Глобал” ахборот таҳлилий порталининг маълум қилишича, дастлаб қандайдир англашилмовчилик бўлгани, шу боис оммани беҳуда ташвишга солиш керак эмаслиги каби мулоҳазалар билан бу ҳақда кенг оммага хабар берилмаган.

“Устоз Мубашшир Аҳмадга қўйилаётган айбловлар умуман асоссиз экани, бу ҳол дастлабки суриштирувдаёқ аниқланишига ва устозни қўйиб юборилишига қатъий ишонч бор эди. Аммо, афсуски, вазият ундай бўлиб чиқмади”, — дейилади портал хабарида, бироқ унга айнан қандай айб қўйилганига аниқлик киритилмаган.

Қайд этилишича, Туркия қонунлари бўйича гумонланувчини 3 кундан ортиқ тутиб туриш мумкин эмас, шу муддат ичида қўйилаётган айб исботланса, адлия идораларига ўтказилиши, исботланмаса, чиқариб юборилиши лозим. Баъзан чет эллик шахсларни қайтариб юбориш (депортация) марказларига ўтказишади ва у ердан ўз ватанига жўнатишади ёки озод қилишади.

Мубашшир Аҳмад орадан шунча кун ўтиб ҳам депортация марказида экани тушунарсиз бўлиб қолаётгани таъкидланиб, унга адвокатлар ёрдами кўрсатилаётгани ва бошқа барча керакли чора-тадбирлар кўрилаётгани қўшимча қилинганди. “Замин” янгиликларини “Telegram”да кузатиб боринг