Залужний Украинанинг Британиядаги элчиси сифатида Ғарбга мурожаат билан чиқди

^{Фото: JORDAN PETTITT / AP}
Украина Қуролли кучлари собиқ бош қўмондони Валерий Залужний Британиядаги элчи этиб тайинланганидан сўнг илк бор чиқиш қилди. Лондонда бўлиб ўтган RUSI Land Warfare Conference 2024 Қироллик мудофаа тадқиқотлари бирлашган институти конференциясида у глобал можаролар хавфи ва Ғарб жамиятини сафарбар қилиш зарурлиги ҳақида огоҳлантирди. Залужний ўз нутқи матнини 22 июл, душанба куни кечқурун Telegram-каналида эълон қилди.

«Инсоният навбатдаги урушни - Учинчи жаҳон урушини хотиржам қабул қилишга тайёрми?» - деди Залужний Биринчи ва Иккинчи жаҳон урушлари тахминан 60 миллион одамнинг ҳаётига зомин бўлганини эслаб. Собиқ бош қўмондон фикрича, украиналиклар Россия билан 10 йиллик уруш - Россия Қрим ва Донбассга 2014 йилда кириб келган пайтдан то 2022 йилда тўлиқ миқёсли можаро бошланишига қадар бўлган тажрибасини бўлишиши керак.

Украина курашининг тажрибаси «тинчлик йўлини қидираётган ҳар бир киши учун фойдали бўлади», деди у. «Биз инсониятга нима бўлаётганини ва инсоният нимага тайёр бўлиши кераклигини айтишимиз керак, - деди Залужний. - Эркин ва демократик давлатлар ҳамда уларнинг ҳукуматлари уйғониб, ўз фуқаролари ва мамлакатларини қандай ҳимоя қилиш ҳақида ўйлашлари керак».

Замонавий урушлар қандай характерга эга?

Украина Қуролли кучлари собиқ бош қўмондони сўзларига кўра, урушларга йўл қўймаслик керак, аммо агар улар бошланса, тайёр бўлиш керак. «Эҳтимол, энг қийин ва муҳим таркибий қисм жамиятнинг ҳокимият ва халқ ўртасидаги ҳалол ва шаффоф мулоқотга асосланган тайёргарлигидир. Жамият омон қолиш учун бир қатор эркинликлардан вақтинча воз кечишга рози бўлиши керак. Замонавий урушлар, афсуски, тотал характерга эга. Улар нафақат армия, балки бутун жамиятнинг ҳам саъй-ҳаракатларини талаб қилади», деди у.

Залужний ўз нутқида Россия ва Украина ўртасида ҳозирги можародаги жанговар ҳаракатлар жараёнида ўзгаришлар «XXI асрда урушлар ва уруш санъатининг чизмаларини аниқлаб беради», деб таъкидлади. Унинг сўзларига кўра, гап дронлардан фойдаланишда эмас, балки душманга қарши курашиш учун умуман инновацион технологияларни қўллашда. Шу билан бирга, Залужнийнинг фикрича, ушбу босқичда жанговар ҳаракатларда томонлар фақатгина технологик ресурсларга эга бўлмайди ва «ягона йўл жанговар ҳаракатларда иштирок этувчи инсон ресурслари сонини кўпайтириш бўлиши мумкин».

Тўлиқ миқёсли урушнинг биринчи босқичида Украина Қуролли кучларига қўмондонлик қилган Валерий Залужний 2024 йил феврал ойида бош қўмондонлик лавозимидан озод қилинди ва май ойида у ҳарбий хизматдан бўшатилиб, Британияга элчи этиб тайинланди. “Замин” янгиликларини “Twitter”да кузатиб боринг