Хитойда туғилиш даражасини ошириш кампанияси бошланди

^{Фото: Getty Images}
Хитойда туғилиш даражасини ошириш кампанияси бошланди, у никоҳни рағбатлантириш ва оилаларда болалар сонини кўпайтиришга қаратилган бўлиб, турли жабҳаларни қамраб олади. Бу ҳақда Financial Times хабар берди.

Маҳаллий ҳокимият органлари турмуш қурган аёлларга қўнғироқ қилиб, уларнинг фарзанд кўриш режалари билан қизиқмоқда. Аёллар саломатлигини текшириш учун улар консултацияларга таклиф қилинади. Бир ёки ундан ортиқ боласи бор оилалар учун яна бир бола туғилишини рағбатлантирувчи махсус нафақалар назарда тутилган.

Бундан ташқари, Хитойдаги университетлар никоҳ ва севги масалаларига бағишланган махсус курсларни жорий этиши шарт. Ушбу курслар ёлғиз талабаларга мўлжалланган бўлиб, уларга келажакда мамлакатда туғилиш даражасининг ошишига ҳисса қўшиши мумкин бўлган муносабатларни ўрнатишда ёрдам беради.

2035 йилга келиб Хитой иқтисодий ва демографик қийинчиликларга дуч келиши мумкин. Бу Фушун шаҳридаги вазиятдан кўриниб турибди. Журналистлар шаҳарда ёшлар сони камайиб, кексалар улуши ортиб бораётганига эътибор қаратди.

“Хитой аҳолиси учта асосий тенденцияга дуч келмоқда: аҳолининг қариши, туғилиш ва никоҳ даражаларининг пастлиги. Болалар сони камайиб, кексалар сони кўпаймоқда. Хитойда аҳолининг қариш суръати ва кўлами мисли кўрилмаган даражада юқори”, деди таниқли иқтисодчи Рен Зепинг.

Бироқ, мутахассислар туғилиш даражасини ошириш бўйича расмий чоралар ёшларни оила қуришга ундашига шубҳа билан қарамоқда. Чунки ишсизликнинг кўпайиши ва иқтисодий ўсиш секинлиги туфайли бунга эришиш қийин кечади. «Замин» янгиликларини «Вконтакти»да кузатиб боринг