Трампнинг Ferrari F430 автомобили аукционга қўйилди (фото)

Америка автомобиллари аукцион уйи Rockstar АҚШ президенти Дональд Трампнинг машинасини кимошди савдосига қўйди. Бу ҳақда аукцион уйи сайтида хабар берилди.

^{Фото: Rockstar Car Auction}
Лотга 2007 йилда ишлаб чиқарилган Ferrari F430 Coupe русумли суперкари киритилган. Автомобиль айнан Трампга тегишли эканига далил сифатида ҳужжатлар ва ДЖТ (Дональд Жон Трамп) ҳарфлари билан давлат рўйхатидан ўтказиш белгиси ҳам сайтга жойлаштирилган.

^{Фото: Rockstar Car Auction}
Президент бу машинага қанча вақт эгалик қилгани айтилмаган. Ferrari’нинг ҳолати яхши деб баҳоланган: машина ҳеч қачон урилмаган ва бўёқ шаффоф плёнка билан ҳимояланган. Rockstar аукцион уйи автомобиль ҳолатини 10 баллдан 9 баллга баҳолаган.

Ferrari F430 Coupe спорткари қизил рангда. Интерьери эса қаймоқ рангли юқори сифатли чармдан ишланган. Машина механик узатмалар қутиси билан ҳаракатланади.

^{Фото: Rockstar Car Auction}
Автомобилнинг техник хусусиятлари:
Ferrari F430 Coupe 490 от кучига эга, 4,3 литрли V8 двигатели билан жиҳозланган. У 100 км/соат тезликка 3,9 сонияда чиқади. Спорткарнинг максимал тезлиги 315 км/соатни ташкил қилади. Ҳужжатларга кўра, Трампнинг машинаси 15,1 минг км масофа босиб ўтган.

Rockstar аукционида F430 Coupe 1 миллион долларга баҳоланди, деб ёзади Auto Bild. Германияда худди шундай характеристикага эга автомобиль одатда 150 мингдан 180 минг АҚШ долларигача нархда сотилади.

^{Фото: Rockstar Car Auction}
Эҳтимол, кимошди савдолар уйи аввалроқ Трампнинг 1,1 миллион долларга сотилган Lamborghini Diablo VТ га асосланиб Ferrari’га шундай нарх белгилагандир. “Замин” янгиликларини “Telegram”да кузатиб боринг