Сурия муваққат президенти Саудия Арабистонига илк расмий ташрифини амалга оширди

2 февраль куни Сурия муваққат президенти Аҳмад аш-Шара ўзининг илк хорижий сафари доирасида Саудия Арабистонига борди. Associated Press агентлигининг хабар беришича, бу ташриф Дамашқнинг ўз иттифоқчиларини қайта шакллантираётганидан далолат беради. Хусусан, Сурия Эрондан узоқлашиб, Саудия Арабистонига яқинлашаётган кўринишда.

Аш-Шара ташриф чоғида ташқи ишлар вазири Асад ал-Шайбоний билан бирга Саудияга йўл олди. Саудия аэропортида уни мамлакат байроғи билан бирга Суриянинг янги уч юлдузли байроғи ҳам қарши олгани агентлик томонидан қайд этилган.

Муҳаммад бин Салмон билан учрашув

Аш-Шара Саудия валиаҳд шаҳзода Муҳаммад бин Салмон билан Ар-Риёддаги "Ал-Ямама" саройида музокаралар ўтказди. Саудия матбуоти ушбу ташрифни "Суриянинг хавфсизлиги ва барқарорлигини қўллаб-қувватлаш йўлидаги қадам" деб баҳолади. Саудия Арабистони расмий агентлиги маълум қилишича, шаҳзода аш-Шарани президентлик лавозимини эгаллагани билан табриклаб, Сурия халқи учун барқарорлик ва тараққиёт тилаган. Аш-Шара эса Саудия ҳукуматига кўрсатилган қўллаб-қувватлаш учун миннатдорчилик билдирган.

Учрашувда Суриянинг келажаги, мамлакатда иқтисодий вазиятни яхшилаш ва унинг ҳудудий яхлитлигини сақлаш масалалари муҳокама қилинган.

Суриянинг сиёсий йўналишидаги ўзгаришлар

2011 йилда Саудия Арабистони Башар Асадга қарши исёнчиларни қўллаб-қувватлаган асосий давлатлардан бири эди. Бироқ, Асад Россия ва Эрон ёрдами билан ҳокимиятни сақлаб қолганди. Аш-Шаранинг ҳокимиятга келиши эса Суриянинг халқаро позициясида ўзгаришларга йўл очмоқда.

Январ ойида Саудия ташқи ишлар вазири шаҳзода Файсал бин Фарҳон Дамашққа ташриф буюриб, Сурияга қарши санкцияларни бекор қилиш бўйича мулоқотлар олиб борилаётганини маълум қилган эди. Аш-Шара эса халқаро санкцияларни бекор қилиш учун дипломатик саъй-ҳаракатларни кучайтирмоқда.

Ташрифдан аввал у Қатар амири Шайх Тамим бин Ҳамад Ол Соний билан учрашиб, Сурия масаласида Қатарнинг қўллаб-қувватлаши муҳим эканлигини таъкидлаган эди.

Манзара ўзгармоқда

The Guardian нашри ушбу ташриф минтақавий иттифоқлар таркибида катта ўзгаришлар содир бўлаётганидан далолат беришини қайд этган. Шу билан бирга, Саудия 2023 йилда Сурияни қайтадан Араб Лигасига қабул қилган эди. Бу эса Саудиянинг Аш-Шаранинг асосий иттифоқчилари бўлган Қатар ва Туркиядан фарқли ёндашувга эга эканлигини кўрсатмоқда.

Ҳозирги вақтда Сурия ҳали ҳам турли жангарилар таҳдиди остида. Манбиж шаҳрида содир бўлган портлашлар тинч аҳолини ҳалокатга олиб келаётгани вазиятнинг жиддийлигини кўрсатади. Аш-Шара Саудия Арабистони билан яқин ҳамкорлик орқали Сурияни тинчлик ва барқарорлик сари олиб боришни мақсад қилган. “Замин” янгиликларини “Telegram”да кузатиб боринг