21:29 / 14.02.2025

Вашингтон суди Трампга хорижий ёрдамни қайта тиклашни топширди

^{Фото: ABC News}
Вашингтон округ суди АҚШ президенти Дональд Трамп маъмуриятига чет эл ёрдам дастурларини 90 кунга тўхтатиб қўйишни назарда тутган фармонни бекор қилиш ва шунга мос равишда бундай дастурларни қайта бошлаш мажбуриятини юклади, деб ёзади Дарё нашри.

Associated Press (AP) агентлигига кўра, бу АҚШ Халқаро тараққиёт агентлиги (USAID) молиялаштиришни тўхтатиш билан боғлиқ биринчи қарордир.

Федерал судья Амир Али ўз қарорида “ёрдамни тўсатдан тўхтатишнинг чет элдаги ташкилотларга етказган кенг кўламли зарари”га ишора қилиб, USAID томонидан молиялаштириладиган иккита халқаро ташкилот — ОИТСга қарши вакцинани ҳимоя қилиш коалицияси ва Жаҳон соғлиқни сақлаш кенгаши томонидан киритилган даъво бўйича вақтинчалик қарор чиқарди.

"Аввалроқ Трамп маъмурияти вакиллари бундай молиялаштириш дастурларини тўхтатиш кераклигини таъкидлаган эди. Бироқ, улар нима учун чет эл ёрдамини бутунлай тўхтатиш ягона оқилона ечим бўлганига “ҳеч қандай тушунтириш бермади” ва молиялаштиришнинг тўхтатилиши туфайли ёпилиш арафасида бўлган кўплаб кичик ва йирик ташкилотларни эътиборсиз қолдириш учун сабаблари борлигини исботлай олмади", деди судья Али.

АҚШнинг Колумбия округидаги Федерал округ суди судьяси 7 февраль куни Трамп маъмуриятининг тахминан 2700 нафар USAID ходимини ишдан четлатиш ва маъмурий таътилга чиқариш режаларини тўхтатиб қўйди. Бундан ташқари, аллақачон таътилга чиқарилган 500 нафар ходим иш жойига қайтарилиши кераклиги белгиланди.

Америка ОАВларнинг хабар беришича, Вашингтон судьяси Карл Николс бундай ҳаракатларнинг қонунга хилофлигини даъво қилган икки касаба уюшмасининг талабини қондирган. У Трамп маъмурияти ҳаракатларининг қонунийлигини аниқлаш учун далилларни тезкор кўриб чиқиш имкониятини бериш мақсадида Вашингтон режаларини амалга оширишни 14 февралгача тўхтатиб туришни буюрди.

Касаба уюшмалари даъвосида АҚШ ҳукуматининг USAID фаолиятига тўсқинлик қилувчи ҳаракатлари “глобал гуманитар инқирозга олиб келгани, USAID ходимлари, грант олувчилари ва пудратчиларининг энг муҳим ишини тўсатдан тўхтатиб қўйгани” ва минглаб иш ўринларини йўқотишга сабаб бўлгани, шунингдек, “АҚШ миллий хавфсизлиги манфаатларини хавф остига қўйгани” таъкидланган. Ҳужжатда USAID агентлигини фақат Конгресс тарқатиб юбориши мумкинлиги, Трамп маъмуриятининг ҳаракатлари эса “конституцияга зид ва қонунга хилоф” эканлиги қайд этилган.

Аввалроқ Трамп USAID’нинг барча лойиҳаларини 90 кунга музлатиб қўйган ва деярли барча ходимларни ишдан бўшатиб, агентликни тарқатиб юбориш ниятида эканини маълум қилганди.

"Бутун дунё бўйлаб ташкилотда ишлайдиган 10 минг кишидан фақат 290 нафарини, хусусан, соғлиқни сақлаш ва гуманитар ёрдамга ихтисослашганларни қолдириш режалаштирилган", деб хабар берди The New York Times суҳбатдошлари.

Трамп маъмурияти USAID’ни нафақат асоссиз харажатларда, балки “Ал-Қоида” ва Афғонистонда гиёҳванд моддалар ишлаб чиқариш билан боғлиқ лойиҳаларни молиялаштиришда ҳам айблади.