Халқаро тадқиқотчилар гуруҳи мактабларда смартфонларни тақиқлаш кутилган ижобий натижа бермаслиги ҳақида хулоса қилди. 11 давлатдан иборат олимлар томонидан ўтказилган тадқиқотга кўра, бу чеклов чоралари ўсмирларнинг соғлиғи, уйқу сифатини, ўқув фаолиятини ва дарс пайтидаги хатти-ҳаракатларини сезиларли даражада яхшиламайди.
Смартфонларни тақиқлаш ечим эмас
Тадқиқот Англияда мактабларда смартфонлардан фойдаланишни чеклаш сиёсати самарадорлигини баҳолаш жараёнида бошланди. Натижалар шуни кўрсатдики, бу каби чекловлар мавжуд муаммоларни тўлиқ ҳал қилмайди. Баъзи ҳолларда эса болаларда вақтни бошқариш ва диққатни жамлаш кўникмаларини ривожлантиришга тўсқинлик қилиши мумкин. Олимларнинг таъкидлашича, замонавий технологиялар кундалик ҳаётнинг ажралмас қисмига айланган ва уларни бутунлай тақиқлаш конструктив ечим эмас.
Комплекс ёндашув – самарали ечим
Тадқиқотчилар болалар, ота-оналар ва ўқитувчилар учун замонавий технологиялардан самарали фойдаланиш бўйича таълим дастурларини жорий этишни тавсия қилмоқда. Улар мактабларда «рақамли гигиена» дарсларини ташкил этишни таклиф қилмоқда. Бундай дарсларда болаларга:
- Ётишдан олдин смартфонлардан фойдаланишни чеклаш;
- Интернетдаги маълумотларни танқидий баҳолаш;
- Онлайн хавфсизлик қоидаларига риоя қилиш каби амалий кўникмалар ўргатилади.
Шунингдек, мутахассислар ота-оналарни ҳам қўллаб-қувватлаш зарурлигини таъкидлайдилар. Уларнинг кўпчилиги фарзандлари билан гаджетлардан фойдаланиш тўғрисида қандай суҳбатлашишни билмайди. Шу боис, улар учун ҳам махсус таълим дастурларини ишлаб чиқиш муҳим.
Янги авлод учун тўғри ёндашув
Замонавий технологиялар болалар ҳаётининг муҳим қисмига айлангани боис, уларни тақиқлаш эмас, балки тўғри йўналтириш самарали ечим бўлиши мумкин. Мактабларда смартфонлардан фойдаланишни чеклаш бўйича ягона ёндашув ўрнига, ўқувчиларнинг рақамли дунёда онгли ва масъулиятли фойдаланувчи бўлиб етишиши учун зарур билим ва кўникмаларни шакллантириш мақсадга мувофиқдир.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
