Трамп: “Россия ҳаракатга ўтсин — ҳар ҳафтада минглаб инсон ўляпти”

АҚШ президенти Дональд Трамп Россиядан урушни якунлаш бўйича музокараларни тезроқ бошлашни талаб қилди. У бу ҳақда Truth Social ижтимоий тармоғидаги баёноти орқали чиқиш қилди.

“Россия ҳаракатга ўтиши керак. Жуда кўп одам ўляпти — ҳар ҳафтада минглаб қурбонлар”, — деб ёзди Трамп.

Уиткофф — Путин музокаралари арафасида
Ушбу баёнот Трампнинг махсус вакили Стив Уиткофф Россияга йўл олиб, Владимир Путин билан учрашишдан бироз олдин эълон қилинди.

Маълумотларга кўра, музокараларда сулҳ шартлари муҳокама этилиши кутилмоқда. Уиткофф бунгача Россиянинг халқаро иқтисодий алоқалар бўйича вакили ва Тўғридан-тўғри инвестициялар жамғармаси раҳбари Кирилл Дмитриев билан ҳам учрашган.

Кремл рози бўлмаса — санкциялар?
Axios нашри ёзишича, Трамп маъмурияти Кремлни огоҳлантириб, агар Россия сулҳга кўнмаса, апрель охирига қадар янги санкциялар жорий қилинишини маълум қилган.

Шу билан бирга, Трамп Россиянинг Украинадаги ҳарбий ҳаракатларини: “Бемаъни ва даҳшатли уруш”, — деб баҳолаган.

Маҳбуслар алмашинуви ҳам амалга ошди
11 апрель куни Абу-Даби шаҳрида АҚШ ва Россия расмийлари маҳбуслар алмашинувини ўтказди. Унга кўра:

• Россия Қўшма Штатлар–Россия фуқароси Ксения Карелинани озод қилди;
  
• АҚШ эса 2023 йили Кипрда ҳибсга олинган, Германия ва Россия фуқаролигига эга Артур Петровни русларга топширди.
  

Петров — АҚШда ишлаб чиқарилган микроэлектроника воситаларини ноқонуний экспорт қилишда гумонланаётган шахс.

Трамп: “Уйга қайтганингдан хурсандмиз”
Карелинанинг миннатдорлик видеосини Truth Social саҳифасида эълон қилган Трамп шундай ёзди:
“Уйга қайтганингдан хурсандмиз.”

Сиз нима деб ўйлайсиз — Трампнинг фаол позицияси урушни якунлашга ёрдам бера оладими? «Замин»ни Telegram’да ўқинг!