Сурияда давлат тўнтаришига уриниш фош қилинди — Асад тарафдорлари қўлга олинмоқда

Сурияда янги ҳукумат давлат тўнтаришига уринишнинг олдини олди. Бу ҳақда мамлакат Ички ишлар вазири Анас Хаттоб маълум қилди, дея хабар тарқатди давлат агентлиги SANA.

Вазирнинг сўзларига кўра, тўнтариш режаси собиқ ҳокимият — яъни Башар Асад ҳукуматига алоқадор офицерлар томонидан тайёрланган. Аниқ вақт маълум қилинмаган, аммо бу ҳаракатни давлат қуролли кучлари ва халқнинг ҳамкорлиги орқали бартараф этилгани айтилмоқда.

“Биз ағдарилган режимнинг офицерлари томонидан режалаштирилган давлат тўнтаришини йўқ қилдик,” — деди Анас Хаттоб.

Асад тарафдорлари билан зиддият ва қуролли тўқнашувлар

Суриядаги сиёсий ноаниқлик март ойида авжига чиқди. Латакия, Тартус, Хама ва Хомс вилоятларида Асад тарафдорлари бўлган алавийлар ва янги ҳукумат кучлари ўртасида кучли қаршилик ва қуролли тўқнашувлар рўй берди.

Натижада 1 300 дан ортиқ одам ҳалок бўлган, улардан камида 1 000 нафари — тинч аҳоли.

Ҳукумат кучлари 10 март куни бошлаган хавфсизлик рейдларини якунлади. Сурия Мудофаа вазирлиги маълум қилишича, “ташқаридан қўллаб-қувватланаётган Асад режими қолдиқлари зарарсизлантирилди”.

Асаднинг тақдири ва Россия билан муросалар

Шундан сўнг Суриянинг янги президенти Аҳмад аш-Шараъа Россиядан Башар Асадни экстрадиция қилишни талаб қилди. Al Arabiya ва Al Hadath нашрлари хабарига кўра, у Асадни суд қилиш учун Сурияга қайтаришни хоҳламоқда.

Бироқ Москва бу талабни рад этди. Россия расмийлари бу масалани икки давлат ўртасидаги муносабатларни тиклаш йўлида “енгиб бўлмас тўсиқ” эмас, дея баҳоламоқда. «Замин»ни Telegram’да ўқинг!