Mrs. Globe International-2025 гўзаллик тожи ҳиндистонлик Анурада Гаргга насиб этди

Хитойнинг Шенжен шаҳрида бўлиб ўтган Mrs. Globe International-2025 халқаро гўзаллик танлови ўз ниҳоясига етди. Танловда 80 дан ортиқ давлатдан келган иштирокчилар жам бўлишди.

Бу йил танловнинг бош тожига Ҳиндистондан келган 15 йиллик тажрибага эга молиячи ва аёллар ҳуқуқлари фаоли Анурада Гарг лойиқ деб топилди. Анурада учун бу ғалаба янги эмас: у аввалроқ Mrs. India Globe 2024 миллий танловида ғалаба қозониб, халқаро мусобақага йўлланмани қўлга киритган эди.

Ғолибликдан сўнгги чиқишида Анурада Гарг шундай деди:

“Мен бу тожни Ҳиндистонга олиб келишдан ғурурланаман. Танловда қатнашиш мен учун фақат унвон ёки тож учун эмас, балки бутун дунёга аёлларнинг кучини, иродасини ва қатъиятини кўрсатиш учун ажойиб имкониятдир. Мен шу орқали аёлларни ўз кучларига ишонишга илҳомлантирмоқчиман”.

Анурада Гарг касби бўйича молия соҳасидаги йирик банклар ва суғурта компанияларида фаолият юритган. Шу билан бирга у ёга, медитация, рақс ва мода билан шуғулланади. Унинг ҳаётий шиори жуда таъсирчан:

“Ҳақиқий гўзаллик — бу ишонч, меҳр-оқибат ва самимиятдадир”.

Эслатиб ўтамиз, Mrs. Globe гўзаллик танлови 1996 йилдан буён ташкил этилиб, ўз ҳаётини топган, шу билан бирга бошқаларни илҳомлантирувчи ва ривожлантирувчи аёллар ўртасида ўтказилади. Танлов қатнашчилари ўзининг ҳаётий қадриятлари, лидерлик қобилиятлари ва ижтимоий фаоллигини намойиш этади. «Замин»ни Telegram’да ўқинг!