“Қабрим оддий бўлсин”: Папа Франциск ҳаётдан қандай кетди ва нима васият қилди?

Ватиканда катта соғинч ва юракларни зирқиратиб юборган хабари эълон қилинди: Рим папаси Франциск инсультдан кейинги кома ва юрак тўхташи сабабли оламдан ўтди, деб маълум қилди Ватикан соғлиқни сақлаш департаменти раҳбари Андреа Арканжели.

Понтифик ҳаётининг сўнгги соатлари
Папа Франциск 2025 йил 21 апрель куни, ўз қароргоҳи — Каса-Санта-Мартада вафот этди. У 88 ёшда эди.

Февраль ойи ўрталарида у бронхит ташхиси билан шифохонага ётқизилган, кейинроқ эса ҳолати янада оғирлашиб, унда икки томонлама ўпка яллиғланиши (пневмония) аниқланган. Папа бир неча бор сунъий нафас аппаратига уланган.

Франциск 23 март куни, 38 кунлик даволанишдан сўнг Ватиканга қайтганди. Вафотидан атиги бир кун олдин, 20 апрель куни у Авлиё Пётр майдонида жамоат олдида сўнгги марта кўриниш бериб, йиғилган католикларни Пасха байрами билан табриклаган эди.

Видолашув маросими ва дафн
Рим папаси билан видолашув маросими 23 апрель куни Ватикандаги Авлиё Пётр саборида бўлиб ўтади. Францискни дафн қилиш эса 25–27 апрель кунлари оралиғида амалга оширилиши кутилмоқда. Ана шу аниқ санани католик черкови кардиналлари белгилайди.

Францискнинг васияти — ҳеч қандай дабдаба йўқ
Папа Франциск 2022 йил июнь ойида васиятнома ёзган ва унда у Санта-Мария-Мажоре базиликасидан жой олишини истаганини билдирган. У дафн маросими харажатлари хайрия маблағлари ҳисобидан амалга оширилишини ҳам алоҳида таъкидлаган.

Энг қизиғи — у қабрига оид дизайнни ҳам ўз васиятида тавсифлаб кетган:

“Қабр ерда, оддий бўлсин. Ҳеч қандай зинапоя ёки безаклар шарт эмас. Унда фақатгина битта сўз — Франсиск — деб ёзилса бас,” — дейилади понтификнинг васиятида.

Папа Франциск ўз ҳаётини камтарлик, бағрикенглик ва муҳаббат билан ўтказди. Сиз уни қандай хотиралар билан эслайсиз? «Замин»ни Telegram’да ўқинг!