АҚШ Украинадаги алоқаларни Жули Дэвисга ишониб топширди

Америка Қўшма Штатларининг тажрибали дипломати Жули С. Дэвис (Фишер) 5 май кунидан бошлаб АҚШнинг Украинадаги муваққат вакили сифатида ўз фаолиятини бошлайди. Бу ҳақда 1 май куни АҚШнинг Киевдаги элчихонаси расман маълумот тарқатди.

Трамп ва Рубионинг номидан дипломатик миссия

Жули Дэвис энди АҚШ президенти Доналд Трамп ва давлат котиби Марко Рубио номидан Украина ҳукумати ҳамда украин халқи билан мулоқот учун масъул бўлади. Элчихона матбуот хизмати таъкидлашича, у икки давлат ўртасидаги ҳамкорликни мустаҳкамлаш, урушни тугатиш ва хавфсиз, барқарор келажак сари қадам қўйиш йўлида тинмай меҳнат қилади.

Бир вақтнинг ўзида — икки элчихонада

Қизиғи шундаки, Жули Дэвис АҚШнинг Кипрдаги элчиси лавозимини ҳам сақлаб қолади. Бу унинг икки муҳим фронтда фаолият олиб боришини англатади. Дэвис дипломатик хизматда катта тажрибага эга:
▪️ АҚШнинг Беларусдаги элчиси/махсус вакили,
▪️ Давлат котибининг Ғарбий Европа ва ЕИ масалалари бўйича ёрдамчиси ўринбосари,
▪️ АҚШнинг НАТОдаги доимий миссиясида элчи ўринбосари лавозимларида фаолият юритган.

Элчи тайинланмагунча — асосий шахс

Айни пайтда АҚШ президенти томонидан Украинага янги элчи тайинланмагунча, Жули Дэвис муваққат асосда ушбу лавозимда иш олиб боради. Унинг вазифаси — икки мамлакат ўртасидаги стратегик муносабатларни юқори даражада сақлаш ва мустаҳкамлаш.

Америка Украинада тинчлик ва тараққиёт учун янгидан-янги саъй-ҳаракатларини бошламоқда. Бу сафар бошқа дипломат эмас, балки катта дипломатик тажрибага эга Жули Дэвисга ишонч билдирилди. Унинг Киевдаги фаолияти АҚШ–Украина муносабатларини янги босқичга олиб чиқиши кутилмоқда.

Бу каби тайинловлар АҚШнинг Украинага нисбатан стратегик ечимларга таянган, аниқ ва жиддий сиёсат юритаётганидан дарак беради. «Замин»ни Telegram’да ўқинг!