
Дунёдаги энг машҳур ижтимоий тармоқлардан бири – Facebook асосчиси ва Meta компанияси бош директори Марк Цукерберг ўз рафиқаси Прицилла Чанга махсус буюртма асосида ноёб ва қулай минивен яраттирди. Қандай қилиб? Бу ҳақда батафсил маълумотларга эътибор қаратамиз.
Марк ва Прицилла оилавий саёҳатлар учун қулай ва кенг автомобил излаган, аммо стандарт минивенлар уларнинг талабларига мос келмаган. Шунинг учун ҳам Цукерберг махсус буюртма орқали Porsche компанияси ҳамда машҳур West Coast Customs тунинг студиясига мурожаат қилиб, спорткарнинг юқори тезлиги ва унумдорлигини минивен қулайлиги билан бирлаштирган эксклюзив автомобиль ясашни буюртма қилди.
Эксклюзив Porsche минивени қандай яратилди?
Автомобилнинг асоси сифатида дунёга машҳур Porsche Cayenne Turbo GT олинган. Унинг корпуси махсус узайтирилган ва ён томонларига қулайлик билан очиладиган электр эшиклари ўрнатилган. Шу тарзда, оилавий саёҳатларда қулай кириш ва чиқиш имконияти ҳосил қилинган.
Капот остида юқори самарадорлик ва қувватни таъминловчи 4,0 литр ҳажмга эга, икки турбинали V8 двигатели ўрнатилган. Бу эса минивеннинг спорт автомобильга хос бўлган юқори тезлик ва динамика хусусиятларига эга бўлишига олиб келади.

Автомобиль ички қисми ҳам жуда юқори даражадаги қулайлик билан жиҳозланган. Унда спорт услубида безатилган уч қатор ўриндиқлар мавжуд бўлиб, бу эса оила учун саёҳатларда қўшимча қулайлик яратади. West Coast Customs студияси томонидан ишлаб чиқилган дизайн ҳам автомобилга эксклюзив кўриниш бахш этади.
Цукербергнинг шахсий автомобили ҳам диққатга сазовор
Минивендан ташқари, Марк Цукерберг ўзининг шахсий фойдаланиши учун ҳам Porsche 911 GT3 Touring спорт автомобилини буюртма қилди. Бу автомобил унинг шахсий гаражидаги эксклюзив машиналарнинг сонини яна биттага оширади.
Марк ва Прицилланинг гаражида яна қандай автомобиллар бор?
Facebook асосчиси ва унинг рафиқаси ўз гаражларида фақат эксклюзив ва қимматбаҳо машиналарни эмас, балки кундалик ҳаётда қулай ва ишончли бўлган автомобилларни ҳам афзал кўришади. Улар орасида қуйидаги автомобиллар мавжуд:
1. Acura TSX: Бу ўрта ўлчамдаги седан ўзининг ишончлилиги ва қулайлиги билан ном қозонган. Машина 2,4 литрли, тўрт цилиндрли двигатель ва 5 тезликка эга узатмалар қутиси билан жиҳозланган.
2. Volkswagen Golf GTI: Кундалик фойдаланиш учун қулай, ихчам ва тежамкор бўлган ушбу спортга оид хусусиятларга эга автомобиль ҳам уларнинг танловидан ўрин олган.
3. Honda Fit: Тежамкорлиги ва қулай сиғими билан ажралиб турувчи, шаҳар ичида ҳаракатланиш учун мўлжалланган ихчам машина.
4. Пагани Ҳуайра: Цукерберг гаражининг энг қиммат ва энг эксклюзив автомобили бўлиб, унинг нархи 1 миллион доллардан ошади. Бу автомобил ўзига хос дизайн ва кучли двигательга эга бўлиб, ҳақиқий коллеционерлар учун орзу қилинган моделлардан бири ҳисобланади.
Цукербергнинг автомобиль танлови унинг ҳаётга ёндашувини кўрсатади
Миллиардер Марк Цукерберг ҳаётда кўпинча соддалик ва қулайликни афзал кўришини таъкидлайди. Унинг автомобиллар танловида ҳам бу жиҳат яққол кўзга ташланади. Ортиқча дабдаба ва эътибордан қочиб, ўзининг ва оиласининг эҳтиёжларига мос бўлган юқори сифатли, функционал ва ишончли транспорт воситаларини афзал кўради.
Цукербергнинг ўз рафиқаси учун яратган бу эксклюзив минивени эса оилавий қадриятларга берилган аҳамият ва мукаммалликни яратиш истагининг яна бир намунаси сифатида кўрилади. Бундай автомобил билан улар нафақат қулайликда, балки юқори унумдорлик ва эстетик жиҳатлардан ҳам баҳраманд бўлишади.
Фото: dzen.ru «Замин»ни Telegram’да ўқинг!
Ctrl
Enter
Хато топдИнгизми
Иборани ажратиб Ctrl+Enter тугмасини босинг