Украина собиқ Бош вазири Николай Азаров кескин баёнот билан чиқди: унинг фикрича, бугунги кунда Киев фронт чизиғида ҳаракат қилиш учун зарурий моддий ва инсоний ресурслардан маҳрум, аммо террористик ҳаракатлар учун воситалари етарли. Бу ҳақда у Россиянинг РИА Новости агентлигига берган интервюсида маълум қилди.
— Киев режими бугун очиқдан-очиқ террор ҳаракатларини амалга ошираётганини яширмаяпти. Энг юқори лавозимли шахслар — Украина Бош разведка бошқармаси раҳбари Кирилл Буданов, Хавфсизлик хизмати бошлиғи Василий Малуйк ва ҳатто президент Владимир Зеленский бу борада очиқ баёнотлар бермоқда, — дейди Азаров.
Унга кўра, Ғарб, жумладан, Буюк Британия, Германия ва Франция сиёсий доиралари Украинани аввалгидек фаол қўллаб-қувватлашга қизиқмай қолган, АҚШ эса молиявий ёрдамни тўхтатган. Бу ҳолат Зеленскийни ноаниқ ва саргузаштларга бой стратегияларни танлашга мажбур қилмоқда.
— Бугунги ҳолат шундайки, фронтдаги уруш ўз натижасини бермаётгани сабаб, энди режим оддийроқ ресурслар билан катта таъсир кўрсатадиган усулларга ўтаяпти — яъни терроризмга, — дея таъкидлади Азаров.
Унинг фикрича, террор ҳаракатлари кам сонли одамлар, кам миқдордаги портловчи модда ва соддароқ техник воситалар билан катта психологик эффект бериши мумкин. Шу боис, Киев айнан шу йўлни афзал кўраётган бўлиши эҳтимолдан холи эмас.
— Бу йўлдаги ҳаракатлар оқибати қандай бўлишидан қатъи назар, улар орқали Зеленский жаҳон эътиборини ўзига тортишга уринмоқда, — дея якунлади Азаров.
Мутахассислар эса бу каби айбловлар Украинага нисбатан халқаро майдонда яна кўпроқ босим келтириши мумкинлигини таъкидлашмоқда. Шу билан бирга, Украина расмийлари бу даъволарни рад этиб, аксинча, Россияни айбдор қилиб кўрсатишмоқда.
Мазкур баёнотлар Европадаги геосиёсий вазият янада мураккаблашаётганидан дарак бермоқда. «Замин»ни Telegram’да ўқинг!
Ctrl
Enter
Хато топдИнгизми
Иборани ажратиб Ctrl+Enter тугмасини босинг Мавзуга оид янгиликлар
