Япония ўзбекистонлик ишчиларни кўпроқ жалб қилмоқчи

Япония ҳукумати Ўзбекистон, Ҳиндистон, Шри-Ланка ва бошқа Жанубий ҳамда Марказий Осиё давлатларидан кўпроқ меҳнат муҳожирларини жалб қилишни режалаштирмоқда, деб Kursiv.media хабар берди.

Бунга сабаб — Жануби-Шарқий Осиё мамлакатларидан, хусусан Вьетнам ва Хитойдан келаётган ишчилар сонининг камайиб бораётганидир.

Шу муносабат билан, япон компанияси Onodera User Run Ўзбекистон Меҳнат миграцияси агентлиги билан ҳамкорлик келишувини имзолади. Компания ўзбекистонлик ёшларга япон тилини ўргатади ва имтиҳонни муваффақиятли топширганларига Японияда иш жойи топишга кўмаклашади. Ҳар йили тахминан 200 нафар мутахассис ресторан ва кекса кишиларга қараш соҳаларида ишлаш учун тайёрланади.

Шунингдек, Ўзбекистонда келгусида Японияда ишлашни хоҳловчилар учун учта япон тилини ўқитиш маркази ҳам ташкил этилган. Улар япон талабалар ва меҳнат муҳожирларига ёрдам берадиган компания ташаббуси билан очилган. Ҳозирда Японияда фақат 346 нафар ўзбекистонлик ишчи фаолият юритмоқда.

Хитой ва Вьетнамдан ишчи кучи камайгани сабабли Японияда керакли кадрларни топиш тобора мураккаблашмоқда. Бундан ташқари, Жанубий Корея ва Тайван каби давлатлар ҳам хорижлик ишчиларни жалб этиш учун рақобат олиб боряпти, чунки у ерда ҳам маошлар ортиб бормоқда. «Замин»ни Telegram’да ўқинг!