Ҳиндистонда ҳақиқий детектив сценарийларни ортда қолдирган воқеа жамоатчиликни ҳайратга солди. Мамлакатнинг икки ёш ўқитувчиси Голливуднинг машҳур “Эгрилик сари” (“Breaking Bad”) сериалидан руҳланиб, қонуний йўлдан четга чиқишга қарор қилди.
Маълумотларга кўра, 35 ёшли физика репетитори ва 25 ёшли кимё ўқитувчиси бирга ижарага олинган хонадонда яширин нарколаборатория ташкил этишди. Расмий маълумотларда қайд этилишича, улар икки ой ичида мефедрон синтетик наркотик моддасини тайёрлаш бўйича тўлиқ ишлаб чиқаришни йўлга қўйган. Манбаларда келтирилишича, тайёрланган меф миқдори 150 килограммга яқин бўлган, унинг бозор қиймати эса тахминан 220 минг долларни ташкил этган.
Тергов жараёнида ёш ўқитувчилар ўз қилмишларига тўлиқ иқрор бўлишган. Уларнинг айтишича, “Breaking Bad” сериалидаги воқеалар уларни илҳомлантирган, молиявий муаммолар ва қарзлардан қутулиш учун ана шундай қадам ташлашга қарор қилишган.
Ажабланарлиси, Болливуд ўз сценаристларини четга суриб қўйди — бу галги воқеа ҳаётнинг ўзи томонидан “ёзилди”. Мамлакат оммавий ахборот воситаларида бу иш катта муҳокамага сабаб бўлди. Қонун ҳимоячилари томонидан нарколаборатория фаолияти тўхтатилди ва айбдорларга нисбатан жиноий иш қўзғатилди.
Маълумот учун, “Эгрилик сари” (“Breaking Bad”) АҚШда суратга олинган ва бутун дунё бўйлаб машҳурликка эришган сериал. Асарнинг асосий қаҳрамони, ўпка саратонига чалинган кимё ўқитувчиси Уолтер Вайт оиласининг молиявий келажагини кафолатлаш мақсадида жиноий йўлга қадам қўяди — у собиқ ўқувчиси Жесси Пинкман билан бирга метамфетамин ишлаб чиқариш ва сотишни бошлайди. Бу сюжет ўз вақтида кўплаб киноҳаваскорлар ва мутахассислар томонидан юқори баҳоланган эди.
Ҳиндистонлик ўқитувчилар ҳикояси эса, афсуски, экранда эмас, ҳаётнинг ўзида кескин оқибатларга олиб келди. Мутасаддилар таъкидлашича, ҳар қандай кино ёки сериалдаги воқеалар ҳақиқий ҳаётда ўзини оқламайди ва оғир оқибатларга сабаб бўлиши мумкин.
Ҳозирда тергов ва суд жараёнлари давом этмоқда. Жамоатчилик эса бундай “илҳомланишлар”дан воз кечиш зарурлигини таъкидлаб, ёшларга тўғри ҳаётий танлов қилиш кераклигини эслатмоқда.
«Замин»ни Telegram’да ўқинг!
