Хитойнинг Қингхай провинциясида рўй берган йирик фожеа бутун жамоатчиликни ташвишга солди. 22 август куни тонг отар пайтда, маҳаллий вақт билан соат 03:00 атрофида Жаинка округида қурилаётган кўприкнинг асосий кабели узилиб кетиши оқибатида тўлиқ қулаган.
Ушбу ҳалокатда 12 нафар ишчи ҳаётдан кўз юмди, яна 4 нафари бедарак йўқолгани хабар қилинди. Бу ҳақида мамлакатнинг расмий агентлиги Синьхуа маълумот берди.
Фожиа содир бўлган пайтда қурилиш майдончасида жами 16 нафар ишчи бўлган. Кутилмаганда 108 метрлик пўлат тўсиннинг асосий қовурғаси синди ва бутун конструкция ишчиларни сувга тортиб кетди.
Дарҳол қутқарув ишлари бошланди. Расмий маълумотларга кўра, соат 14:00 га келиб ҳодиса жойига 806 нафар қутқарувчи, 91 та техника воситаси, 27 та қайиқ, 1 вертолёт ва ҳатто 5 та робот жалб этилган. Шунингдек, яраланган ишчилар яқин атрофдаги 6 та шифохонага етказилган.
Хитой фавқулодда вазиятлар бошқармаси тезкорлик билан махсус ишчи гуруҳни жўнатди. Улар қутқарув ишларини назорат қилиш, бедарак йўқолганларни топиш ва ҳалокат сабабларини ўрганиш билан шуғулланмоқда. Мутасаддилар барча ресурсларни сафарбар этишга ва келгусида бундай фожеалар такрорланмаслиги учун қонун-қоидаларни кучайтиришга ваъда беришди.
Маълумотларга кўра, қурилаётган кўприк пўлат арк конструкцияси асосида қурилмоқда эди. Лойиҳанинг асосий қисми август ойининг охирига қадар тугалланиши режалаштирилган. Бироқ ушбу фожеа катта қурилишнинг тақдири ва хавфсизлик тизими ҳақида жиддий саволларни келтириб чиқарди.
Шубҳасиз, кўприк қулаши фақат қурилиш соҳаси эмас, балки бутун мамлакатда хавфсизлик стандартларига нисбатан талабларни янада кучайтириш зарурлигини кўрсатмоқда. Миллионлаб одамлар ҳаёти ва тақдири айнан ана шундай объектлардаги ишончлиликка боғлиқ экани яна бир бор яққол намоён бўлди.
«Замин»ни Telegram’да ўқинг!
