Хитойда шифокорлар инсон ақлига сиғмас операция амалга оширдилар: уч ёшли қизчанинг бошига санчилган 15 сантиметрли пичоқ муваффақиятли чиқариб олинди. Бу ҳақида South China Morning Post хабар тарқатди.
Воқеа Юннань провинцияси, Кунминг шаҳрида август ойида содир бўлган. Интернет тармоқларида тарқалган видеода қизалоқ бошига пичоқ қадалган ҳолда онаси билан шифохонага йўналгани акс этган. Бу манзара кўплаб инсонларни ўзига жалб қилди ва ҳолат катта муҳокамаларга сабаб бўлди.
Ҳодисанинг келиб чиқиш сабаблари турлича талқин қилинмоқда. Қизчани шифохонага олиб келган она дастлаб “мен чойшабларни алмаштираётгандим, бехосдан пичоқ қизнинг бошига учиб кетди”, деб баёнот берган. Бироқ тиббиёт муассасаси ходимларидан бири “она аслида қизини қўрқитиш учун пичоқни қўлига олган ва эҳтиётсизлик билан унинг бошига отиб юборган”, дея айтиб ўтди.
Шифокорлар зудлик билан операция ўтказиб, пичоқни муваффақиятли олиб ташлашди. Қизалоқнинг аҳволи ҳозир барқарорлиги хабар қилинмоқда. Мутасаддиларнинг таъкидлашича, бу ерда боланинг ёшлиги ва суяк тузилишининг юмшоқлиги ҳал қилувчи омил бўлган.
“Агар она шошқалоқлик билан пичоқни ўзи суғуриб олганида, вазият тамомила бошқача ва қайғули тугаши мумкин эди. Фақат тиббиёт ходимларининг профессионал ёрдами қизнинг ҳаётини сақлаб қолди”, — деди шифокор.
Ҳодиса нафақат Хитой, балки бутун жаҳонда ота-оналарга жиддий сабоқ бўлди. Чунки болаларни қўрқитиш мақсадида ёки уйда эҳтиётсизлик билан совут қуролларни ишлатиш қайғули оқибатларга олиб келиши мумкин.
Шубҳасиз, қизчанинг тирик қолиши мўъжиза сифатида баҳоланмоқда. Айни пайтда полиция ва тиббиёт идоралари воқеа тафсилотларини чуқур ўрганмоқда.
«Замин»ни Telegram’да ўқинг!
