Туркманистон Республикаси ҳукумати 2025 йил якунига қадар мамлакат ҳудудида сигарет чекишни бутунлай тақиқлашни режалаштирмоқда. Бу борада расмий идоралар томонидан эълон қилинган маълумотларга кўра, давлат аҳолиси саломатлигини сақлаш ва касалликларнинг олдини олиш мақсадида кескин чораларни амалга оширмоқда.
Жаҳон соғлиқни сақлаш ташкилоти маълумотларига кўра, Туркманистон аҳолиси сони тахминан 7 миллион атрофида бўлиб, уларнинг фақатгина 7 фоизи чекувчилар қаторига киради. Бу рақам Марказий Осиё давлатлари орасида энг паст кўрсаткичлардан бири ҳисобланади. Мамлакатда бир неча йиллардан буён тамаки маҳсулотларига қарши олиб борилаётган қатъий сиёсат ўз самарасини бермоқда.
Айниқса, сўнгги йилларда чекувчилар сони кескин камайгани кузатилди. Бу жараёнга фаол тарғибот ишлари, тамаки маҳсулотларини сотишга қўйилган чекловлар, мактаб ва иш жойларида махсус таълимий дастурлар таъсир кўрсатмоқда. Чекишга қарши қонуний механизмлар фақат шахсий тартибда эмас, балки жамоат жойлари, ишхона, муассаса ва ҳатто транспорт воситаларида ҳам қатъий назорат остига олинган.
Шу билан бирга, Туркманистондаги тиббиёт ходимлари ҳам ушбу ташаббусни қўллаб-қувватлашмоқда. Уларга кўра, чекувчилар сонининг камайиши нафақат нафас йўллари касалликларини камайтиради, балки инфаркт, инсульт, онкология касалликларининг олдини олишда ҳам муҳим аҳамиятга эга.
«Замин»ни Telegram’да ўқинг!
