Буюк Британиянинг машҳур Costa Coffee қаҳвахоналари энди аввалгидек кўп мижоз жалб қилмаяпти. Ёшлар орасида бу тармоқ севимлилигини йўқотмоқда.
Асосий сабаб — ичимликларга бўлган дид ўзгариши. Ҳозир кўплаб ёшлар қаҳва ўрнига яшил чойдан тайёрланадиган матча ичимликларини танламоқда. Рақобатчи қаҳвахоналар менюсига матча латтелар қўшган, лекин Costa Coffee ҳали бу янгиликни жорий қилмаган.
Шу сабабли кўплаб мижозлар Starbucks ёки кичик мустақил қаҳвахоналарга ўтмоқда. Масалан, Лондонда очилган Blank Street Coffee қисқа вақт ичида ижтимоий тармоқлар орқали катта машҳурликка эришди.
Мутахассисларнинг айтишича, одамлар энди оддий қаҳвани уйда тайёрлайди, қаҳвахонага эса ноодатий ва янги таъм учун боради. Агар Costa замонавий ичимликларни таклиф қилмаса, у бозорда рақобатчиларга ютқазиши мумкин.
Coca-Cola компанияси эгаси тармоқни сотиш ҳақида ўйлаяпти. Чунки 2019 йилда катта пулга сотиб олинган бу тармоқ ҳозир кутилган даромадни бермаяпти.
«Замин»ни Telegram’да ўқинг!
