АҚШнинг Флорида штатида яшовчи бир фуқаро тунги вақтда қўшнисининг машинасига бостириб кирган қароқчини полиция келгунига қадар ўзи қўлга олди. Қизиқ жиҳати шундаки, у буни Бетмен образига ўхшаш пижама кийган ҳолда амалга оширди, деб ёзади СCМП.
Воқеа Кейп Корал шаҳрида содир бўлган. Эрталаб соат 2 ларда полицияга бир нечта автомобилга ҳужум қилинганлиги ҳақида хабар берилган. Гумонланувчи 20 ёшли Жастин Шимпл бир нечта машинани очиб, ичидагиларни талон-торож қилган.
Шу пайтда автомобиллардан бирининг эгаси Кайл Майветт уйдан чиқишга мажбур бўлди. У сигнал овозидан уйғониб, кўчага чиққанида ўғрининг юк машинасини кавлашини кўрди. Майветт орқадан етиб бориб, қароқчини ушлаб қолди ва полиция етиб келгунига қадар уни назоратда ушлаб турди.
Ҳуқуқ-тартибот ходимлари воқеа жойига келгач, Майветтнинг жасоратини қадрлашди ва ҳаттоки у билан хотира учун суратга тушишди.
Аниқланишича, Шимпл аввал ҳам ўғирлик учун полиция қўлига тушган. Бу сафарги ҳибс давомида у учта йирик ва иккита кичик ўғриликда айбланди. Жиноятчидан нақд пул, қимматбаҳо қўл соатлари, 500 доллардан ортиқ совға карталари ва умумий қиймати 300 долларлик иккита Рай-Бан кўзойнак топилган.
«Замин»ни Telegram’да ўқинг!
