Португалия ҳам Фаластин давлатини расман тан олди

Португалия Буюк Британия, Канада ва Австралиядан сўнг Фаластин давлатини тан олганини эълон қилди, деб Gazeta.uz хабар берди. Бу ҳақда мамлакат ташқи ишлар вазири Паулу Ранжел БМТдаги штаб-квартирада журналистларга маълум қилди.

Унинг сўзларига кўра, Фаластинни тан олиш Португалия ташқи сиёсатининг муҳим ва доимий йўналишидир. “Бу адолатли ва барқарор тинчлик сари ягона йўл бўлган икки давлат ечимига ишончимизни ифода этади”, — деди вазир.

Португалия ҳукумати Ғазодаги гуманитар фалокат, аҳоли кўчирилиши, мактаб ва шифохоналарнинг йўқ қилиниши, диний бинолар ва инфратузилманинг вайрон бўлишини қоралади. Ранжелнинг таъкидлашича, Фаластинни тан олиш бу муаммоларни бартараф этмайди, аммо сиёсий ечим сари қадам ҳисобланади.

Нодирбек Раззоков

«ЗАМИН.УЗ» муҳаррири