Вьетнамлик рассом Гиннес рекордлар китобига кирди. UPI хабарига кўра, Лу Конг Гуен 34 йил давомида тирноқларини олмасдан юриб, дунёда энг узун тирноқлар эгасига айланди.
Унинг икки қўлидаги тирноқлари умумий ҳисобда 5,9 метрга (19 фут 6 дюйм) етган — бу эса ўртача жирафанинг бўйидан ҳам узунроқдир.
Гуеннинг сўзларига кўра, у ёшликда ўқитувчи бўлишни орзу қилган ва шу мақсадда тирноқларини «улуг‘вор кўриниш учун» ўсдира бошлаган. Унинг отаси шаман бўлгани сабабли диний эътиқоди ҳам бу қарорга таъсир этган. Бироқ кейинчалик отасининг талабига кўра ўқитувчиликдан воз кечган, аммо тирноқларини олишдан тийилиб, рассомлик билан шуғуллана бошлаган.
“Шундан бери уларни олмай юрдим ва тирноқларим янада узаяверди. Агар уларни кесишга тўғри келса, жисмонан ҳам, руҳан ҳам оғир аҳволга тушиб қолар эдим”, — дейди рассом.
Унинг таъкидлашича, бундай тирноқларни асраб-авайлаш катта масъулият талаб қилади.
“Ёмғир ёғса, уларни албатта қуруқ сақлашим зарур, чунки нам бўлса, юмшаб синиб кетиши мумкин. Одам кўп жойларда кимдир тегиб кетса ҳам осонгина шикастланади. Шунинг учун ишда ҳам, ҳаракатда ҳам эҳтиёткор бўлишимга тўғри келади”, — дея қўшимча қилган Гуен.
