Вьетнамда содир бўлган кучли тўфон юрт аҳлини оғир қайғуга солди. “Буалои” деб номланган тўфон ва унинг ортидан келган тошқинлар оқибатида 36 нафар инсон ҳалок бўлгани маълум қилинди, деб хабар берди The Straits Times.
Маълумотларга кўра, тўфон 29 сентябрь куни мамлакатнинг шимолий марказий соҳилларига зарба берган. Кучли шамол, баланд тўлқинлар ва узлуксиз ёмғирлар кўплаб ҳудудларда вайронгарчиликка олиб келган. Расмий ҳисоботларга кўра, ҳозирга қадар 21 киши бедарак йўқолган, яна 147 нафар фуқаро турли тан жароҳатлари билан шифохоналарга етказилган.
Табиий офатнинг иқтисодий зарари ҳам жуда катта. Ҳукумат маълумотларига кўра, “Буалои” тўфони ва сув тошқинлари мамлакат иқтисодиётига тахминан 11,5 триллион донг, яъни 435,8 миллион доллар атрофида моддий зиён етказган.
Жабр кўрган ҳудудларда йўллар, кўплаб мактаб бинолари ва давлат идоралари зарарланган. Электр таъминотининг йўқолиши туфайли ўн минглаб оилалар ёруғликсиз қолган. Маҳаллий матбуот ёзишича, баъзи вилоятларда бир неча кундан бери сув сатҳи пасаймай қолаётгани аҳоли ҳаётини янада қийинлаштирмоқда.
Расмий ҳисоботларда 210 мингдан зиёд уйга турли даражада зарар етгани, айримлари эса мутлақо сув остида қолиб кетгани айтилмоқда. Шунингдек, 51 минг гектардан зиёд қишлоқ хўжалиги ерлари, асосан гуруч далалари ва бошқа экинлар бутунлай йўқ қилинган.
Офат туфайли минглаб оилалар ўз уйларидан кўчирилиб, вақтинчалик бошпаналарга жойлаштирилгани ҳам маълум қилинди. Ҳукумат ва қутқарув хизмати барча имкониятларни ишга солиб, қидирув-қутқарув ишларини давом эттирмоқда. Шу билан бирга, халқаро ҳамкорлик ва ёрдам дастурлари ҳам ишга туширилиши мумкинлиги айтилмоқда.
Мутахассислар эслатишича, Вьетнамда ҳар йили йирик тўфонлар кузатилади ва уларнинг кўпчилиги юзлаб инсонлар ҳаётига хавф солади. “Буалои” эса охирги йилларда кузатилган энг йирик ва ҳалокатли табиий офатлардан бири сифатида қайд этилмоқда.
“Zamin”ни Telegram'да ўқинг!
