Россия президенти Владимир Путин Нобел қўмитасининг сўнгги қарорлари ҳақида фикр билдириб, унинг нуфузи сезиларли даражада пасайганини таъкидлади. Унинг сўзларига кўра, қўмита сўнгги йилларда тинчлик йўлида амалий иш қилмаган шахсларга ҳам мукофот берган, натижада “Тинчлик мукофоти” ўз қадрини йўқотган.
Путин Душанбедаги матбуот анжуманида бу ҳақда гапирар экан, АҚШ президенти Доналд Трампнинг фаолиятини эътироф этди. “Трамп Нобел мукофотига лойиқми ёки йўқлигини билмайман, аммо у мураккаб инқирозларни ҳал этишда катта саъй-ҳаракат қилганини тан олиш керак”, — деди Россия раҳбари.
Унинг сўзларига кўра, Трамп тинчликни мустаҳкамлаш бўйича бир қатор ташаббуслар билан чиқиб, халқаро майдонда фаол ҳаракат қилган. “Ҳақиқат шундаки, у урушларни тўхтатиш ва келишувлар орқали барқарорликка эришиш учун уринаяпти”, — дея қўшимча қилди Путин.
Жума куни эрталаб Венесуэла мухолифати етакчиси Мария Корина Мачадо Тинчлик бўйича Нобел мукофоти соҳиби бўлгани эълон қилинганди. Доналд Трамп эса бу қарорни ноодатий қабул қилинган деб ҳисоблаб, ўзини етти урушни тўхтатган раҳбар сифатида мукофотга лойиқ деб атаган.
Шу ҳафтада у ўзининг “Трамп режаси” доирасида ҲАМАС ва Исроил ўртасида отишмани тўхтатиш ва гаровга олинганларни озод этиш бўйича келишувга эришилганини маълум қилди.
Аввалроқ Оқ уй матбуот котиби Стивен Чанг ҳам Нобел қўмитаси қарорини “сиёсий тусдаги” деб атаган ва Трампнинг тинчликни таъминлаш йўлидаги ишларини қўллаб-қувватлашини айтган эди.
Айни пайтда Трамп мукофотнинг Мачадога берилишига изоҳ бермаган бўлса-да, у бир неча бор “мукофотни мендан олиб, бошқаларга бериш — Америка учун ҳақорат”, деган фикрни билдирган.
Путиннинг баёноти халқаро майдонда катта қизиқиш уйғотди — айрим таҳлилчилар унинг фикрини “ғарб танқидининг янги босқичи”, деб баҳоламоқда, бошқалар эса бу гапларда “Трамп билан яқинлашиш ишораси”ни кўришди.
“Zamin”ни Telegram'да ўқинг!
