Қирғизистон Миллий хавфсизлик қўмитаси раҳбари Қамчибек Ташиев маълум қилишича, 2026 йилда собиқ Жалолобод, ҳозирги Манас шаҳрига республика аҳамиятидаги учинчи шаҳар мақоми берилади, деб Uz24.uz хабар берди.
Унинг сўзларига кўра, айрим сиёсатчилар Манас пойтахт бўлиши мумкинлигини таъкидлаган. “Агар биз бунга муносиб бўлсак, нега йўқ? Вақт кўрсатади. Бироқ бу учун шаҳар ҳам, халқ ҳам тайёр бўлиши керак. Пойтахт бўлиш осон эмас — катта маблағ, янги инфратузилма ва замонавийлик талаб этилади”, — деди Ташиев.
Ташиевнинг таъкидлашича, Жалолободнинг Манас деб қайта номланиши стратегик жиҳатдан тўғри қарор бўлган. Шаҳар мамлакат тараққиётида муҳим рол ўйнай бошлаган ва энди янги мақомга лойиқ саналади.
Ҳозирда Манас шаҳрида кенг кўламли қурилиш ва инфратузилма ишлари жадал суръатда олиб борилмоқда. Режага кўра, у Қирғизистоннинг энг замонавий ва ривожланган марказларидан бирига айланиши кутилмоқда.
Эслатиб ўтамиз, 17 сентябрь куни Жалолобод шаҳри номи расман Манас деб ўзгартирилган. Ҳозирда шаҳарда 184 мингдан ортиқ аҳоли яшайди, уларнинг тахминан 30 фоизи ўзбек миллати вакилларидир.
“Zamin”ни Telegram'да ўқинг!
