Португалияда жамоат жойларида юзни ёпиб турувчи кийимлар — бурқа, ниқоб ва шунга ўхшаш либослар тақиқланиши мумкин, деб ёзади The Guardian.
Бу қонун лойиҳаси ўта ўнгчи “Чега” партияси томонидан таклиф қилинган. Партия вакиллари фикрича, юзни яшириш аёллар эркинлиги ва тенглик тамойилларига зид. Аммо парламентдаги сўл партиялар бу фикрни қўллаб-қувватламади.
Ҳужжатда “жинсий ёки диний сабабларга кўра юзни ёпиш” ҳақида сўз боради. Қоидабузарлик учун жарималар 200 евродан 4000 еврогача бўлиши белгиланган. Шунингдек, аёлларни диний кийим кийишга мажбурлаганларга уч йилгача қамоқ жазоси назарда тутилган.
Қонун лойиҳасига кўра, айрим ҳолатларда юзни ёпишга рухсат берилади — масалан, самолёт бортида, дипломатик ваколатхоналарда ёки ибодат жойларида.
Ҳозирда ҳужжат Португалия Президенти Марселу Ребелу де Соузага имзолаш учун юборилган. Аммо журналистлар унинг қонунни қайта кўриб чиқиш учун Конституциявий судга юбориши мумкинлигини таъкидламоқда.
Экспертлар айтишича, Португалияда бурқа ёки ниқоб кийадиган аёллар сони жуда оз, аммо бу масала Европанинг бошқа давлатларидаги каби қизғин баҳсларга сабаб бўлиши эҳтимолдан холи эмас.
Маҳаллий жамоатчиликда бу ташаббус эркинлик ва шахсий танлов масаласига айланиб, турли фикрларни келтириб чиқарди. Бир тараф диний эркинликни ҳимоя қилишни муҳим деса, иккинчиси хавфсизлик ва очиқликни устувор деб ҳисоблайди.
Қонуннинг қабул қилиниши Португалияни Франция ва Бельгия каби бурқа тақиқланган Европа давлатлари қаторига қўшиши мумкин.
“Zamin”ни Telegram'да ўқинг!
