Россияда икки оммабоп мессенжер — Telegram ва WhatsApp иши қисман чекланиши мумкин. Бу ҳақда Роскомнадзорнинг маълумотларига таяниб, “РБК” хабар берди.
Идорага кўра, мазкур платформалар фирибгарлик, товламачилик ва террорчилик фаолиятига ёрдам бериш воситасига айланиб бормоқда. Ҳуқуқни муҳофаза қилувчи органлар ва фуқаролардан келган кўплаб шикоятлар асосида текширув бошланган.
“Мессенжер эгалари жиноятларга қарши кураш чораларини кўриш ҳақидаги талабларни эътиборсиз қолдиргани учун уларнинг фаолиятига нисбатан қисман чекловлар жорий этилаётгани ҳақида қарор қабул қилинди”, — дейилади идора баёнотида.
Маълумотларга кўра, 21 октябрь куни Россиянинг жанубий ҳудудларида — Краснодар, Ростов, Астрахан ва Ставрополь ўлкаларида Telegram ва WhatsApp ишида узилишлар кузатилган.
Ҳозирда WhatsApp мамлакатда энг кўп фойдаланиладиган мобил илова ҳисобланади — унинг аудиторияси 96 миллиондан ортиқ. Telegram эса 89 миллион фойдаланувчи билан иккинчи ўринда турибди.
Россия Ички ишлар вазирлиги маълумотича, сўнгги ярим йил ичида айнан шу икки мессенжер орқали 140 мингдан зиёд жиноят содир этилган. Шунингдек, идора уларни “чегара ортидан фуқароларни ёллаш воситаси” сифатида ҳам таърифлаган.
Экспертлар фикрича, агар чекловлар амалга оширилса, бу Россиядаги рақамли мулоқот соҳасида катта ўзгаришларга сабаб бўлиши мумкин.
“Zamin”ни Telegram'да ўқинг!
