Африка қитъасида колера эпидемияси кенг миқёсда тарқалмоқда, деб хабар берди Африка CDC.
2025 йил бошидан буён континентда 23 мамлакатда инфекция аниқланган. Расмий маълумотларга кўра, жами 297 мингдан ортиқ киши касалланган, шулардан қарийб 7 минг нафар бемор ҳаётдан кўз юмган. Бу ҳолат ўлим даражасини 2,3 фоизга етказган.
Энг оғир вазият Ангола ва Бурундида кузатилмоқда. Мутасаддилар бу мамлакатларда санитария тизимидаги муаммолар ва тоза ичимлик сувининг танқислиги вазиятни янада оғирлаштираётганини таъкидламоқда.
Жанубий Судан, Судан ва Конго Демократик Республикасида охирги ҳафталарда касалланиш ҳолатлари бироз камайган бўлса-да, бу давлатлар ҳамон юқори хавф гуруҳига киради. Муттахассислар кучли ёмғирлар сабаб эпидемия йил охиригача яна кенгайиши мумкинлигини огоҳлантирмоқда.
Колера — Vibrio cholerae бактерияси орқали юқадиган ичак инфекцияси бўлиб, асосан ифлос сув ёки озиқ-овқат воситасида тарқалади.
Жаҳон бўйича эса 32 мамлакатда 518 мингдан зиёд ҳолат қайд этилган, шулардан 6,5 мингдан ортиқ киши вафот этган.
Табиблар аҳолини гигиена қоидаларига қатъий риоя этишга, фақат тоза ичимлик сувидан фойдаланишга ва шубҳали озиқ-овқат маҳсулотларидан эҳтиёт бўлишга чақирмоқда. Соғлиқни сақлаш тизимларига эса эпидемияга қарши тезкор чораларни кучайтириш тавсия этилмоқда.
“Zamin”ни Telegram'да ўқинг!
